U Director General of Police ka Meghalaya u R. Chandranathan hawa yaklam wa ki laad pathai khubor ynne ka sngi ha Shillong hajrong i chah siat yap u GS warim ka HNLC u Cherishsterfield Thangkhiew, da ong u wa hadien ka takit ya i tympdung bomb IED ha Khliehriat Police Reserve wa ha Laitumkhrah, da yoh ki sabut wa biang wow pynyoo wa u Cherishsterfield emkti u ha ini i kaam khamtam ha i tympdung ha Khliehriat.
Kamtæ ki ar kynhun ki pulit wa yahkhmat da u SP ka East Jaiñtia Hills wa u SP ka Shillong (Traffic) da lai ki cha i yung u Cherishsterfield yow kynreh yei yung u kamjooh wow kem ya oo heiwa manda psiah chapoh yung u da pyrchah u wei da pyrchang u wow dung ya uwi u Constable wei ha ini i por kam wow yada ya idæ da siat chi kuli heiwa da toh u Cherishsterfield ha i bynta u kpoh heiwa da khlaad noh u ha Civil Hospital, Shillong.
Ki pulit da yoh ki wow kem na i yung u ya kawi ka pistol, ka tari wa ki kot ki sla kam ki sabut. Ka takit hajrong ini da chimkti da ki pulit ka Mawlai Police. Wei chwa wow leh ya ini waroh da dep pyntip cha u Montri wa pait ya ki Kaam Pohyung.
Da pyntip u wa i lai kem toh hadien wa da dep pynman yei takit wei i por leh man i iwa da biang khamtam deiwa pyrkhat ya ka sngi Independence Day kamtæ da emkaam jhan wow leh ya ini.
Hawa kylli, neiliang u DGP da pyntip u wa hawa choh dwar ki pulit da wan hi u Cherishsterfield wow wai wei manda ku ya u rana hapoh yung da jia ini waroh.
U DGP da ong u leh wa ya ki khon u Cherishsterfield ym em kem ya ki tangwa da kit donhi ya ki yow pyntikna ki toh kiyi.
Chooh chooh da pyntip u leh wa daw kem chooh ya kiwi neibhah katni da tip bha ya i rukom krehkaam yong ki.
Hawa kylli, u DGP da ong u wa ki dkhot ka HNLC wa em ha Bangladesh da em ki kamwa 16 ngut, wei kiwa kreh ya ki khlem rieh namo ki Over Ground Worker da em ki kamwa 30 ngut kiwa da tipmit.
Da pyntip u wa da chem leh wa uwa thang yow tympdung yow bomb ha Khliehriat toh u “Drug Addict” uwa tip pyrtuid kam u Ranjit Kumar uwa man kam u wakreh ka HNLC, kamtæ da ong u DGP wa ym toh ki chipai ka HNLC wa leh ya kini i kaam heiwa da thung hi-eh ki da ki kamtu kamni ki bru wow leh ya ini i kaam.
