U Union Minister of State (Independent Charge) Development of North Eastern Region (DoNER), MoS PMO, Personnel, Public Grievances, Pensions, Atomic Energy and Space, u Dr. Jitendra Singh da ong u wa 30% da booh ya kitu ki bynta ka thaaiñ North East kiwa da chah ieh mylliñ.
U Dr. Jitendra Singh da ong ya ini ynnin ka sngi hawa yaklam ya kiwa mihkhmat yaki jaitbru Chakma wa yahkhmat da ki dkhot ka ‘Committee for Citizenship Rights of the Chakma and Hajong’ kiwa na Arunachal Pradesh, heiwa da ong u Montri wa ka North Eastern Council toh kawa ya krehlang waka Ministry of Development of North Eastern Region (DoNER) heiwa deiwa e buit u Home Minister u Amit Shah, da wanrah ki yaka phang (Proposal) kawa da mynjur ha ka Cabinet Meeting wa khlieh da u Prime Minister u Narendra Modi. Kamtæ da ong u wa da rai wa 30% ka poisa ka North Eastern Council wow wanrah yaki kaam pynroi hapoh ki ki Scheme wa katni ka North Eastern Council daw pynemkaam yow yarap yow pynku ya kitu ki chnong ki thaw kiwa da chah ieh mylliñ kiwa em ha ki jylla ka North East.
U Dr. Jitendra Singh da ong u leh wa ini daw wanrah ym du yaka roi ka paar kamjooh yow pynwiar noh yei noh chilliang i yoh yarap ki jatibru waphær waphær wa kynthup ya ki Chakma. Hapoh kani ka Scheme daw wanrah leh yow pynneh pynsah yaki dustur riti ka thaaiñ North East yow pynroi yaki ktien ki thylliej tynre kamjooh i thoh i tar iwa da jan dooh jait.
U Dr. Jitendra Singh da pynkynmoo u ya i thong u Prime Minister Narendra Modi wow pynku yaka thaaiñ North East yow poi ko ha i jooh i kyrdan wa kiwi ki jylla wa da roi da paar hapoh ka ri heijooh i por yow pyntikna wa i yoh bhah man i iwa salonsar hapyrdi waroh ki jaitbru wa em hapoh ka thaaiñ North East deiwa booh ya kani ka bhah wa 30%.
U Dr. Jitendra Singh leh da yaroh u yaka North Eastern Council yeiwa pteiñ ko yei kaam yong ka hapyrdi ka khlaam COVID-19. Da klam u leh yei e yarap ka Ministry of Development of North Eastern Region (DoNER) waka North Eastern Council cha ki jylla ka North East neibynta ka khlam COVID-19.
Haka kani ka sngi da e leh yaka dorkhat cha u Dr. Jitendra Singh da u Uttam Chakma.
