Shillong: Ka Election Commission ha ka jylla hadien wa da booh ya kiwa pait bniah ya Election chiteiñ samoi ha Ranikor Constituency, ha kani ka kynti da pynkrehkaam noh da ka buit yongrim wow pyntip khubor deiwa thoh dak ha ki moo ha ki thaw wa boon wow pyntip da ki kor tanghæng næ ki Banner ha ki thaw wym poi kari namo em Phone.
Kani ka sien nyngkong wa da leh kamni neibhah wow pynlai election ha kani ka juk Internet wa katni heiwa ki bru chaniah ki ya ka, dang haap pynemkaam da ki stat yong rim.
Ka Ranikor Constituency toh kawi na kiwa dang sahdien bha wei boon ki chnong ym em sarok ki da kiwa biang, wei ya ini da pynsñiaw leh da ki bru wa pawkhmat ka thaaiñ.
Ka Ranikor daw jied ko ya uwa mihkhmat yong ka ha ka 23 tarik uni u bnai wei neiliang ka tnat Election da yaleh ko wow pynbiang wow lai bait ki kaam, tangwa i tkhoh ki luti syngkieñ, da wanrah ko chiboon i eh i khoo iwa pynbor ya ka Election Commission wow thooh da ki laad warim wow e wyrta.
Hawa yaklam wa u Chief Electoral Officer (CEO) ka jylla, u Federick R Kharkongor da ong u wa ka Ranikor Constituency toh ka thaw wa eh wei chitom bha wow phah khubor neibhah i wym biang ki sarok wei ym em Mobile Network.
“Em 25 tylli ki Sector wa 10 tylli ki Zone ha Ranikor ki wym ye u lai kari wei ymhoi u pynemkaam Mobile Phone,” da ong u CEO deiwa pynrap leh wa em ki Polling Station kiwa haap lai du dei kjat.
“Wow pyndap yei eh wa ka tnat yachem ko, da booh i kamwa 10 hadooh 15 ngut ki bru wow phet wow rah wyrta wa jhan cha ki Sector Officer, Returning Officer wa cha u District Election Officer (DEO),” da ong u.
U Kharkongor da ong u leh wa em ki thaw wa haap lai kjat da ki kynta na kawi ka Polling Station cha kawi won neidaw wym lait kari wei wym em Network Mobile.
“Ya kiwa phet haap phah i cha ki thaw wa em ki polling station wa haap lai da ki kynta, em kiwa haap lai chiteiñ kynta wei chikynta chiteiñ, wot hadooh le kynta cha ki thaw wa tip kam ka Amsang wa em markhap wa ka South Garo Hills,” da ong u CEO.
(Feature Image-File Photo)
Discussion about this post