U Montri ka chnat Puræ Puthi ka sorkar jylla uwa man leh u MLA ka Amlarem Constituency, u Lahkmen Rymbui ynne ka sngi da hiar booh mooyurim u neibynta u chna yaka Eklavya Model Residential School (EMRS) ha chnong Umladkhur wa haap hapoh ka Amlarem Sub-Division hei emlang ka R.M. Kurbah, Director of School Education & Literacy Meghalaya, u B.D.R. Tiwari, Commissioner & Secretary Education ka sorkar Meghalaya, u Pravesh Bajpai, Senior Engineer ka WAPCOS Ltd, ki dkhot ka National Education Society for Tribal Student, ka Y.R. Mawlong, SDO Amlarem, ki sahep waphær, kiwa chong chnong, ki khynnah skur wa kiwi haka yalang wa pynlai daka A.P. Syiem, DSEO West Jaiñtia Hills District.
Ya kani ka skur da mang u chna hei lut wa T. 45,79,99,000 lyngba ka Ministry of Tribal Affairs ka sorkar India nadooh Class 6 hadooh Class 12, ha i thaw wa heh kamwa 15 Acre wada e sñiawbha da ka chnong hi, wei daw pait pynlai yaka daka Meghalaya Residential Society.
Da mang leh u chna waroh i emkaam ki khynnah skur wa kynthup leh ki thaw sah khnang wa ki khynnah u yohlaad bha ki u pynlut por hei puræ deiwa sah bait heini.
U Lahkmen Rymbui hawa klam ong u kani toh ka kreh wa heh tam hapoh Amlarem Sub-Division neibynta i myntoi ki paidbah, wei wym em wa ye mutdur wow poi kam kani ka skur ha Umladkhur kawa khlem da hap su bai skur, deiwa pynrap leh toh wa oo maya wei pyrkhat u ya kiwa dooh wa duk.
Da ong u wa kani ka skur man ko kawa yatoh kyrdan wa kiwi won ki skur hapoh ka ri India, wei ha kani ka skur ki khynnah daw yoh ki leh yei sikai wa yatoh wa ka JEE deilang ka NEET.
Hawa pynsñiaw ya kiwi won ki kaam pynroi wa da wanrah, ong u du hapoh ka chnat Puræ Puthi naki 20 tylli ki yungskur, 10 tylli da mang T. 37 lak kawi wa 10 tylli da mang T. 44 lak tam kawi.
Da em leh 5 tylli wa da mang mar T. 20 lak chaneiñ kawi lyngba ka Border Area, 15 tylli da mang mar T. 10 lak lyngba ka Ministry of Tribal Affairs. Hapoh Pdengshakap da mang T. 4 klur tam neibynta u chna Hostel yong ka Residential School ka wym slem de da sdang najrong kiwi won wa kynthup yaka Nongtalang College kamjooh ka Sohkha Higher Secondary School.
Da ong u wa ka Nongtalang College katni da yoh ko T. 3 klur chi snem neibynta u su tulop ya kiwa sikai wei ha u snem wow wan daw su sa T. 60 lak neibynta ka tulop haka B.Com Stream kani ka College.
Naka T. 350 klur ki Scheme pynroi wada tooid ha Amlarem Constituency hapoh kini ki 5 snem kam ki thaw sumaar, ki surok, ki umbam umdih wa kiwi, ong u du naka chnat Puræ Puræ leh ym duna de yaka T. 72 klur, heiwa kiwi won ki Constituency hapoh jylla wym em yoh ki kam ka Amlarem.
Da booh yukylli u yaki paidbah deiwa ong myntu u jied wa mihkhmat phi da kiwa ye u yasaaid wei ye wanrah i roi i paar, namo kiwa paitke hi-eh wa yoh kiwi? Wei wot hawa tooid i roi i paar leh ong u daw em won ki wym chynna najrong wa daw em ki bru wow thooh daw bohnia deiwi tawon hajrong i booh mooyurim ha kani ka sngi.
