Ka sorkar Assam da pynmih hukum ko wa hadien wa da chem wa da rap miat i long i man heiyatoh wa ka khlam COVID-19 wei da duna kiwa yoh ya u khñiang na kiwa chah Test kawa tip leh kam ka Positivity Rate, kamtæ da chim ya ka rai wow wai chooh chooh ya ki kaam tangwa lada em ki thaw wa em palat 10 ngut kiwa dang yoh hapoh 7 sngi, ya kini u pynman ya ki kaam ki Total Containment Zones.
Ha ka hukum wa da pynmih ynne ka sngi da pynkylla yei por Curfew i wow sdang noh nadooh 7:00 waje i miet hadooh 5:00 waje i step.
Ki dukan, ki yung krehkaam u wai ki hadooh 6:00 waje i miet, da chah leh wow chong baam hapoh ki Restaurant deiwa em 50% ki bru.
Ki wakreh sorkar kiwa da dep chim tika chisien daw chah u lai kreh ki katwa kitu ki wym pu em chim tika u wan kreh ki katkam wa phah ya ki. Ki yung krehkaam ki bru samen ye wow chim dei yong ki hi i rai hajrong ini. Kiwa punkhon wa kiwa em hei duna hei bynta i doh i pran ye ki wow kreh na yung.
Ki kari kit mar u pteiñ ki wow lai khlem chah pynthut, ki kari kamai u bood ki ya ki kyndon yada COVID-19 heiwa ki Auto Rickshaw, ki Cycle Rickshaw wa ki Taxi u kit ki du arngut donhi ki bru.
Da chah leh yei uiñ hapoh ka District wa na kawi ka District cha kawi da ki kari ki bru samen lait noh na wa cha ka Kamrup (Metro) District. Ym pu chah wow lai ki kari kamai na kawi ka District cha kawi.
Ki thaw puræ (School/College/University) u pteiñ ki wow e sikai lyngba ka Internet. Katwa deiwa wan cha ki thaw puræ u chah ya kitu kiwa leh ya ka Degree/Post-Graduate Final Year ka Engineering/Medical College lada toh kiwa da dep yoh tika pyn arsien kamjooh leh ya kiwa lai puræ Nurse.
Heiyatoh wa i pynman ya ka yalang paidbah kiwa pynman cha lait, u chah wow em hadooh 200 ngut ki bru katwa ha ki khawai bia wa kiwi ki lehkmen ki bru samen deiwa yoh bor na ki DC u chah u em 50% neiwa chniam ki bru lane 200 ngut du kiwa da dep yoh tika pyn arsien.
Ha ki yap bru ym chah wow em palat 25 ngut ki bru.
