Jowai: Ki pulit ka Traffic Branch ka Jowai da pyntip ki wa da yoh kem ki ya ki 5 ngut ki khynnah khynroo hei yatoh wa lute ki ya kawi ka truck ha Diengpasoh, Shillong Bypass.
I lute da jia i ha ka 14 tarik uni u bnai heipor 8 waje i miet heiwa kawi ka truck wa sih ha luti wa yah da u Rishikanta Singh wa em ya u number AS-01-EC-3771 da pyntip u wa kini ki 5 ngut da wan ki da kawi ka kari Maruti Car wa em ya u number ML-10-8477 wei kani ka kari da tyrrah ko ya kani ka truck.
Hadien ini da mih kini ki 5 ngut wei da sai ki ya u Singh wa u Handyman yong oo wei da lute ki na oo T. 10,180 wei da chim ki leh ya ka Driving License, ka EPIC, ka Aadhar Card, ka Mobile Phone yong uwa yah truck wa ki mar wa kit kani ka truck wa kynthup ya ka tape kari wa 4 synduk ki tiar kari (spare parts) ki yong ka Vimal Motors, Guwahati.
Ha i takit ki pulit da chem ki ya kari Maruti Alto 800 ML-04C-3509 wa yah kiwa lute ha Phramer wei hadien wa kdong ki pulit ki da yoh kem ya ka na Mihmyntdu wei ya kini ki bru leh da thooh ki pulit ka Mawdiangdiang ka hei yatoh wa i lute wei da emlang leh ki pulit ka Mawdiangdiang ynnin ka 20 tarik heipor wa kem ya ka.
Ki pulit leh da yoh biang ki ya waroh ki mar wa tooh ki 5 ngut kiwa sah ha Mihmyntdu wa ha Ladthadlaboh, Jowai kiwa tip pyrtuid kam u Albert Lamare, u Richard Kenneth Thubru, u Khop Sten, Banker Pohthmi wa u Bobdoni Khonglah.
Discussion about this post