Ka chnat puræ puthi ka sorkar Meghalaya da pynmih hukum ko wa nadooh ka 01-11-21 waroh ki skur hapoh ka jylla u wai noh ki nadooh Class-I hadooh Class-XII kiwa em cha sor wa cha palatsor.
Kam wow pynkynmoo wa nadooh ka 1 tarik uni u Naichiphaw da chah wow wai skur waroh lait noh ki Class-I hadooh Class-V kiwa em ha sor wa toh u pteiñ ki da ka Online wa deiwa lai mih emkaam donhi cha skur.
Ha ini i wai ya ki skur, ki khynnah emkaam ki wow yohbor chwa na ki bei pa yow lai cha ki skur wei i rukom lai cha skur ye u pynduna.
Ki kynta wow e sika toh u man ki 3-4 kynta chi sngi dei wym chah wow pynman ya kiwon kiwon ki yalang lane ki yalehke Sports.
Ki skur/College toh u booh ki ya ki thaw pyn chongkset deiwa ya krehlang wa ka chnat i chait i khiah lada em iwa jia wa jhan.
Ki DC ye ki wow chim ya ka rai heiyatoh wow wai noh ya ki skur deiwa sdang da ka Task Force Committee yow pait kammon u wai kamjooh lada hoi wow wai.
Yow yada ya ki khynnah, da pynchlur ya kiwa sikai kamjooh ki wakreh wow chim ki yei tika.
Kiwa sikai wa ki wakreh ki wym pu em chim yei tika hap ki wow leh ya ka RT-PCR Test man ka 10 sngi wei wow e ya ka Certificate cha ki khlieh ka skur.
U chah du 15-20 ngut ki khynnah wow em hapoh kamra heipor wa e sikai wei toh u chong yajngai uwi na uwi. Ki khynnah ye ki wow wan skur dei sngi pood lane deiwa booh dei por.
Lada kjut ki khynnah lane kjut kiwa hayung ki khynnah, hap ki wow dam chwa u wan skur.
Ki skur toh u kitkhlieh ki wow pyndap ya iwon iwon wa dooh ki khynnah hawa hap ki u chong yung.
Ya ka snem e sikai namo ka Academic Calendar da booh ha ka website ka chnat Puræ Puthi ha www.megeducation.gov.in wa ha ka website ka MBOSE ha www.mbose.in.
Waroh hap ki wow deiñ ya ki Mask, u sait ya ki kti dei langær wei wow pynemkaam leh ya ki Hand Sanitizers. Toh u pynmyllien leh wow tymmoh yei ktien i khmut hawa ky’oh næ synrieh.
Chwa wow wai ya ki skur toh u sait pynkhooid da ka 1% Sodium Hypochlorite Solution. Katwa kitu ki skur kiwa da pynman kam ki Quarantine Centre toh u pynkhooid bha ya ki.
Ki skur toh u booh ki ya ki Helpline Number, ki Number ki thaw sumaar wa kiwi ki Number wa emkaam wow tip ki khynnah skur, ki wakreh wa kiwa sikai lada emkaam ha iwon iwon i por.
Toh u booh chiboon ki Face Mask, ki Visor, Hand Sanitiser wa kiwi kiwi yow pyntikna wa ym duna ha iwon iwon i por. Toh u pyntikna leh wa biang ki thaw pynlang jhep wei wow noh ki katkam ki kyndon.
Waroh ki thaw psiah toh u em ya ki thaw sait kti lane deiwa booh ya ki Hand Sanitiser, ki Thermal Screening wei lada hoi wow pynboon ya ki thaw psiah wa ki thaw mih.
Ki Poster wa kiwi de ki laad e sikai kammon wow yada na ka khlam toh u booh ha ki thaw wa chynna da waroh.
Ym toh u phah da ki khynnah wow pynkhooid ya ki skur.
Ym toh u pynemkaam lang ya ki kot ki sla, ki khulom, ki klong um wa kiwi kiwi de kam kini ki jait.
Ki Computer, Laptop, Printer wa kiwi kiwi toh u sait pynkhooid da ki 70% Alcohol Wipes.
Lada kjut ki khynnah, kiwa sikai lane ki wakreh ym toh u wan ki cha skur wei hap wow bood ya ki kyndon manda jia ini.
Ki bei ki pa leh toh u kitkhlieh ki yei khooid i jngiar ki kynnah nadooh ki Uniform, Tiffin, ki muna wa kiwi kiwi de.
Ki School Bus u lait ki na ki kyndon Odd/Even.
