Jowai: I metyap yong waroh 4 ngut kiwa chah kset hei chlai um ka NEEPCO Pump House wa em ha Umrangso da chem lut ki heiwa ya i metyap u K. Raju (23 snem) da chem naka mala wa le (G-2 Floor) ynnin ka 23 tarik heipor 2:45 i sngi.
U Raju, toh uwa na ka chnong Pithapuram wa em hajan ka chnong Vishakhapatnam, Andhra Pradesh, da man u leh uwi na ki 4 ngut ki wakreh ka North Eastern Electric Power Corporation Ltd (NEEPCO) kiwa chah kset hapoh ka Pump House. I piah u Pipe wa pynpoi um ka Kopili Hydroelectric Power Station ha 29 Kilo ha Assam Dima Hasao District heipor kamwa 4 waje i step ka 7 tarik uni u bnai da wanrah ko yei chlai um hadooh wa da siat ka um cha suiñ kawa da em hadooh boon spah phut.
I thooh wow chem ya kiwa wiar da sdang ko pyn ha ka sngi wa jia da ki National Disaster Response Force wa ka State Disaster Response Force.
Haka 21 tarik da chem leh ya i metyap u Joysing Tisso (60 snem) uwa kreh kam u Engineer, u Robert John Ngamlai (34 snem) uwa kreh kam u Junior Engineer katwa yei metyap u Prempal Balmiki (54 snem) da chem haka 22 tarik.
U Tisso toh uwa na Jirikendeng, West Karbi Anglong wei da toh u chongngiah u ha uni u bnai, u Ngamlai toh uwa na Lura Saizol, East Jaiñtia Hills katwa u Balmiki toh uwa chong chnong ka Umrangsu.
Ha kani ka sngi wa chlai um toh u em 7 ngut wow kreh tangwa da em kiwa chim chuti.
U NEEPCO Chairman & Managing Director u V.K. Singh da ong u wa i lut na ini wa jia da poi ko hadooh T. 600 Klur.
Discussion about this post