U khynnah wa dang 12 snem uwa pyrtuid Ferdinand Phawa uwa da wiar nadooh ka 22 tarik uni u bnai hadien wa mih u na Sohkymphor, da chem ya oo ynne i sngi na Wapung.
Uni u khynnah da yoo ya oo da ki bru wa lai u dei kjat ha Wapung kamtæ da pynsngeh oo hadien wa da mih Wyrta wa da wiar u.
Katkam wa pyntip kiwa ha-yung uni u khynnah, ha ka step ka 22 tarik da chah mai u ha ka bei u neidaw wa pynthut u yei lai i wan deiwa chong ha tre dwar wei uni u khynnah deiwa chrai da mih u na yung heiwa ki da mut ki jan da liwan u cha chnong wa sah u ha Mihmyntdu Neiñchnong tangwa ym em poi yung u.
Hawa yoh ki wow kylli won na oo ynne cheiwon lai u, da pyntip u wa ha katu ka sngi da mih wei da lai u dei kjat cha i thaw wa sah ki lok u pa u ha Khliehriat Sub-Division wei ynne da liwan u dei mut wow lai dei kjat biang cha Sohkymphor.
Hawa kylli ileh wa lai u dei kjat, da ong u wym em poisa u wow chong kari.
Kiwa ha-yung da pyntip ki wa da jooh lai hi u wow pa u cha Khliehriat Sub-Division wei kitai ki bru wa sahlang u toh kiwa da ya jooh kreh mylla lang wa u pa u.
Kamtæ neiliang ka yung da e khublei ko ya waroh kitu kiwa yarap u thooh ya u khon ki.
Discussion about this post