Da chem ya uwa na Ladrymbai uwa wiar heipor wa lai luti cha Bengaluru

U Chaltbha Muksor uwa chong chnong ka Dong Pohktieh, Ladrymbai, East Jaiñtia Hills District uwa da wiar heipor wa lai luti u da ka rel cha Bengaluru yow lai thooh kreh, da chem biang ya oo.

U Chaltbha toh uwa da mih na chnong u ha ka 2 tarik uni u bnai heipor kamwa 11:00 waje i miet yow lai cha Bengaluru da ka rel heiwa da yoh wow yaklam Phone khaddooh wa oo ha Jolarpettai Junction Railway Station, Tamil Nadu ha ka 5 tarik uni u bnai heipor kamwa 6:00 waje i step wei hadien ini da tympleh ya ka Mobile Phone u.

Hei yaleh wow thooh ya oo, da chem ya oo ha Government Medical College and Hospital, Krishnagiri, Tamil Nadu neidaw wa mynsoo u deiwa takha ka kjat u wei kattæ da em u hei pait ki dkhot ka Khasi Students’ Union Bengaluru Unit.

Hadien wa da pynpoor ya ka khubor wiar bru, ki pulit ka Krishnagiri Police Station da pyntip ki cha u Donboklang Nongphud, President ka KSU Bengaluru Unit wa da em wa chem wa mynsoo u Chaltbha wei da kit ya oo cha Government Medical College and Hospital, Krishnagiri ha ka 8 tarik uni u bnai heipor 3:00 waje i sngi.

Related posts

Ya tyrrah le tylli ki Truck ha i jooh i thaw | Kat wym pu pynchna ya u NH-6 daw pteiñ ong kiwa chong chnong ka Rattacherra

January 9, 2026

Kular u heh spah ka India wow e palat 75% ka poisa u cha ka imlang sahlang hadien wa khlaad syndet u khon

January 9, 2026

Manda poi ki dkhot ka KSU Bengaluru Unit ha kani ka thaw sumaar da chem wa u Chaltbha da mynsoo u deiwa takha ka kjat u wei dang em u hei chah sumaar.

Neiliang ka yung ka sem u Chaltbha Muksor wa ka KSU Bengaluru Unit da pynsñiaw ki yei sñiawngooh ya u SP wa SI ka Krishnagiri Police Station yei chimkhia ki yeini waroh kamjooh ya ka Hospital deilang ki bru wa da e yarap.