Ka Sneha Debnath (19 snem) kawa na Sabroom, Tripura kawa lai puræ ha Atma Ram Sanatan Dharma College ha Delhi, da chem yei metyap ko na wah Yamuna hajan ka Geeta Colony Flyover hadien wa wiar ko nadooh i step ka 7 tarik uni u bnai wei da suba wa da pynkut hi ko yei mynsien deiwa kynthiar na yingkieñ Signature Bridge wa em ha North Delhi.
Hawa takit heiyatoh wa ini wa jia, da chem leh ya ka chithi wa da thoh da ka Sneha kawa da ong wa yeini waroh da leh ko deiwa sñiawthooh hi ko wei da rai ko wow pynkut noh yei mynsien ko deiwa kynthiar na Signature Bridge neidaw wa sñiaw ko wa man ko kam kawa ym ye poi chei thong (Failure) wei ym ye de ko wow kit yeini wei wow im kamni, kamtæ da rai ko wow pynkut noh yei mynsien ko.
Da ong ko leh wym em pynbaad ko ya kiwon kiwon wei ini toh i rai yong ka samen khlem da em kiwon kiwon kiwa pynbor ka.
Kam wow pynkynmoo wa hei step ka 7 tarik, ka Sneha da Phone ko cha kiwa ha-yung ha-sem wa daw lai ko wa ka lok ko kawa tip kam ka Pitunia cha Sarai Rohilla Railway Station tangwa kani ka lok won ko da pyntip ko wym em wan ka Sneha kamwa da pynbait.
Hei takit yeini wa jia da chem ya uwa kamai kari uwa lai booh ka cha ka Signature Bridge wei da khana u wa kamwa 5 minit chwa wow poi cha kani ka yingkieñ da em wa Phone ka wei hadien wa hiar ko na ka kari da lai ko chadien kani ka yingkieñ wei oo leh dong wot u na ini i thaw khlem da suba iyi iyi neibhah em boon ki bru ha ini i thaw.
Ka Sneha toh kawa puræ ya ka 4 Year Undergraduate Course ha ka Mathematics wei chirup wa ini da puræ ko ya ka Data Science and Programming wa ka IIT Madras. Da jooh kreh ko leh kam ka Intern wa kawi ka Company na Australia. Kiwa ha-yung ha-sem da ong ki wa ka Sneha toh kawa stat bha kawa da ye u leh chiboon hei rta wa dang khian.
Discussion about this post