Ynne ka sngi ki pulit da chem ki yei metyap uwi u bru uwa man leh u Handyman ka truck wa em u Number AS-01DD-4496 kawa da ngam ko ha u sarokbah NH06 hajan ka Toll Plaza ka Lumshnong, East Jaiñtia Hills ha ka 16 tarik uni u bnai.
Katkam ka yutip wa da yoh da ong wa hadien wa ngam kani ka truck ha u sarok, uwa yah ya ka truck da pyntip u cha ki pulit wa da wiar u Handyman kani ka truck.
Ya uni u Handyman da tip kam u Bishujit Chakrabarty (36 snem) uwa man u khon u (L) Solundo Chakrabarty na Teliamura Santinagar, Khowai, West Tripura.
Hadien wa tip wa da wiar uni u Handyman neiliang ki pulit ka District wa ka SRT da hiar ki kamwa 400 phut wei sa kamwa 200 meter hadooh wa chem ki ya ini i metyap u Bishujit Chakrabarty.
Heipor kamwa 12:30 ynne i sngi da chem ya i metyap wei da chimpor sa kamwa chikynta wow wanrah ya i metyap hadooh u sarokbah.
Ya i metyap u Bishujit da rah cha Khliehriat Civil Hospital wow leh yeiwa emkaam.
Heiyatoh won wa ka kari wa chah ban da ye wow sai ya ka wei ym em bru de hapoh yong ka neibhah wa da hiar ki na ka kari chwa wow ngam u sarok.
