Shillong: Ka Iewduh kawa heh dooh ka yaw ha ka jylla wa haka thaaiñ mihsngi, daw yoh ko sa kawi ka naam lada krehkaam sakhiat wow khang noh ya ki Plastic hapoh kani ka yaw neini chakhmat.
Ka Hima Mylliem deilang waka KHADC ynne ka sngi da sdang ki ya kani ka thong wow pynman ya ka Iewduh kawa lait na ka Plastic wei heithaw yong ka daw wan biang ki sla, ki kot wa ki muna yaw kiwa da rieh cha kdong neidaw wa wan hiar thma ki Plastic.
Kam ka dak wow sdang ya ka thma, wei wow pynche kamjooh wow paan yaka krehlang ki paidbah, u Syiem wa ki bor ka Hima Mylliem deilang wa ya krehlang wa ka bor ka Khasi Hills Autonomous District Council (KHADC), da pyman yaka yalang ha tyngkong wow psiah cha Iewduh ynne ka step.
Ha kani ka yalang da yoh ya i klam na u Executive Member wa pait ya ka Trade, u Paul Lyngdoh, u Executive Member wa pait ya ka yaw u Jambor War nalor u Syiem ka Hima Mylliem u Paiem Ainam Manik Syiem, heiwa yaka yalang da pynlai da u montri u K. Langstieh wei yaka e khublei pynkut da e u montri M. Kharbukhi.
Kiwa klam da kyntu ki yaki paidbah wa wan thied mar, kiwa chong yaw wow ya krehlang ki yow pynkut syndon ya i pynemkaam Plastic, kawa da pynsih yaka rymaw waka chait ka khiah yong ki briu, deiwa pynemkaam noh da ki sla, ki muna yaw wa ki yusong wa yahap waka rymaw kiwa ye u pyut.
Da pynsñiaw leh ya kiwa yaleh pyrchah wa daw chah pynchitom ki da ka kuna wa i chah kset patok.
Katwa u Jambor da ong u wa kani man ko ka luti kawa daw pynpoi leh cha kiwi ki thaw lada man ko kawa jop.
Kamjooh u Syiem ka Hima Mylliem u Paiem Ainam, da pynbna u ya ki pyrtuid ki pulit na ka Hima wa ki bru na KHADC ki wow sonteri ya kani ka rai.
Discussion about this post