Ki bru ha kylleiñ ka pyrthai hadien wa thied kari ki barabor jooh kwah ki ya ka Number Plate namo u Registration Number da uwa ngait ki wei em ki bru kiwa bien wow su dei dor wow yoh ya ki Number wa kwah ki.
Ha kani ka kynti da ye u dai ya ka Number Plate wa sy’at dor dooh ha pyrthai wei uni u Number toh u ‘P 7’ ha i lilam (Auction) wa da pynman ha Four Seasons Resort Dubai, Jumeirah Beach, Dubai ha ka 8 tark uni u bnai.
Ya uni u Number ‘P 7′ da dai ha i dor 55 Million Dirham iwa man T. 122.6 klur katkam ka poisa India katni wei ya kani ka lilam da pynman da ka Emirates Auction. Ya kani ka poisa u lai ko cha ka ‘1 Billion Meals Endowment Campaign’ yow pyndap baam ya ki bru wa dooh wa duk ha ka pyrthai.
Kani ka Campaign toh kawa da sdang da u Sheikh Mohammed Bin Rashid Al Maktoum, uwa man u Montri Rangbah ka UAE tangwa yei pyrtuid u bru wa jop ya kani ka dai lilam ya uni u Number ym pu em khana paidbah.
Ha u 2016, u Balvinder Singh Sahni uwa tip leh kam u Abu Sabah, da thied u ya ka Number Plate ‘D 5’ ha u 2016 hei dor T. 33 Million Dirham wei ya kani ka poisa leh da pynlai cha ki kaam wow yarap paidbah.
