Ka Khasi Jaintia Development Council Demand Committee, Barak Valley Assam deilang wa ka Barak Valley Khasi Jaintia Welfare Organisation, ka KSU Barak Valley Circle da e dorkhat ko cha u Montri Rangbah ka jylla u Conrad Sangma ynne ka sngi hajrong ka dawa wow chna yaka Khasi-Jaiñtia Development Council ha Assam.
Haka dorkhat wa da e cha u Montri Rangbah da ong wa i dawa wow chna yaka Khasi Jaintia Development Council ha Assam toh iwa da slem bha yow yada yaki jaitbru Khasi-Jaintia kiwa em ha Assam kiwa im wa chong chnong ha Barak Valley (South Assam) kiwa da em palat 1.70 lak ngut ha ki 375 tylli ki chnong wa em cha kdong cha chmiang kiwa jngai na kiwa boon kiwi ki chnong wei kini waroh da em ki ha ki 3 tylli ki District ka Barak Valley aw jan ha waroh ki 15 tylli ki Constituency ka thaaiñ Barak.
Da ong leh wa ya ini i jooh i dawa da dep wow wanrah hakhmat ka sorkar jylla warim wei ya ini i jooh i kaam da booh leh haka Assam State Level Cabinet Sub-Committee kawa da pynman haka 07-01-2015 hadooh wa ka sorkar India lyngba ka Ministry of Tribal Affairs (C&LM-I Division) Shartri Bhawan, New Delhi haka 15-12-2014 da phah ki ha itu i por ya u Commissioner & Secretary ka Department of Welfare Plain Tribes & Backward Classes (WPT&BC), Govt. of Assam, Dispur wow leh ki yeiwa emkaam yow chna yaka Khasi-Jaintia Development Council, tangwa ka sorkar jylla warim ym em ap ko ya ini i dawa yow pynku ya i yoh i kot, ka puræ puthi wa kiwi kiwi.
Da kdaw leh wa nadooh u spah snem wa 18 hadooh kani, ka jaitbru da em ko ki sabut nadooh ka khayi pateiñ, ka dustur riti tangwa da chah ieh mylliñ yaka jaitbru kiwa da im ha i kyrdan wym biang i yoh ya iwa emkaam kamjooh ym yoh yei roi i paar lane kiwon kiwon ki jait kaam wow pynku yaka jaitbru.
Kamtæ da kyntu ya u Montri Rangbah wow yaklam wa u Montri Rangbah ka Assam hajrong ini i kaam.
