Shillong: Kiwa synchaar chnong ka chnong Jyntah deilang wa ki dkhot ka KSU ka thaaiñ wa u MDC ka Sohryngkham u Pyniaid Sing Syiem da lai kyntu ki ya ka sorkar lyngba u symbood montri rangbah, u Prestone Tynsong wow tuklar hajrong i khang ki chipai ka Assam Regimental Centre ya ki ar tylli ki yingkieñ ha ka chnong Jyntah.
Ha kani ka sngi u Pyniaid da ekti u leh da ka dorkhat ha u symbood montri rangbah ka jylla heiyatoh wa i chem chitom ki paidbah ka thaaiñ.
Hawa yaklam wa ki laad pathai khubor, u Pyniaid da ong u wa kiwa chong chnong wa haap ki u lai lyngba ka wah Umkhen hadien wa ki chipai da khang ki ya ka yingkieñ lai kjat wa da chna nadooh ki por wa synchaar ki pharæng wa ya kawi ka yingkieñ lai kari wa chna da ki chipai ka ARC.
Da pyntip u ha kini ki sngi wow wan daw lai biang ki deilang wa ki Engineer ka PWD wow pait yei rukom man ka yingkeiñ neibhah da man ko kawa da rim bha wei kamjooh wow thooh da iwi i thaw lada emkaam yingkieñ na ka sorkar.
“I da kyrpaad i ya u Prestone uwa pait leh ya ka tnat PWD (Roads) wow chna noh da ka yingkieñ ha ka wah Umkhen kawa pynyabi ya ka chnong Jyntah wa Madanrting khnang wow pynsuk yei chitom wa chem, yow lait nei chah pyndik ha ki chipai ka Assam Regiment,” da ong u MDC.
Heiyatoh wa ini, u MDC da pyntip u cha kiwa pathai khubor wa u symbood montri rangbah da kular u wow phah ya u Deputy Commissioner wow lai pait ya kani ka thaw.
“I da pyntip i leh ya u Prestone wa ka yingkieñ man ko kawa rim wei em ko cha palat i chram i thaw sikai siat (Firing Range) ka Assam Regiment, wei kani ka lai sylli daw pynman ha kini ki sngi wow wan.” da ong u MDC ka Sohryngkham.
Discussion about this post