Ynne ka sngi hadien wa poor ka khubor wa khlaad kawi ka manbei kawa dai dakha ha Iaw Chor, Jowai neidaw u COVID-19, neiliang ki paidbah da tieñsar ki khamtam kitu kiwa lai yaw ha kani ka thaw.
Hawa yaklam wa u DC ka District, u Garod LSN Dykes hajrong ini, da pyntip u wa kani ka manbei kawa da khlaad da tip ya ka kam ka M. Rymbai kawa 50 snem i rta kawa na chnong Khliehtyrchi, West Jaiñtia Hills.
Da ong u wa ka kong Rymbai da khlaad ko ynnin ka 10 tarik ha Woodland WK Hospital, Sabahmuswang neidaw u COVID-19 wei da jooh em chitom yin-an (Asthma) ko nadooh nachwa.
U Garod da pyntip u leh wa ka sngi khaddooh wa da wan chong dukan ko toh ha ka 3 tarik kawa man ka sngi kawa da pynkrehkaam ya ka Containment Measure ya ka Jowai (kawa sdang nadooh ka 1 Naisan) wei hadien wa chitom ko da chah sumaar noh ko ha Woodland WK Hospital nadooh ka 8 tarik.
Chooh chooh da pyntip u wa neiliang ka chnat i chait i khiah da leh ko ya ka Contact Tracing namo wow booddien ya kiwa yajan, kiwa yachem wa ka heiwa waroh da em ki 37 ngut wei da phah ya ki wow chong-kset ki ha yung (Home Isolation) wei lada em ki ya ki dak wa chitom ki na u COVID-19 wow pyntip cha ka chnat.
