Ka Meghalaya State Women Commission (MSCW) da rai ko wow thoh cha u Montri ki kaam pohyung ka jylla, u Lahkmen Rymbui hadien wymye ki pulit wow leh yeiwa emkaam hajrong ka ujor wa chah dat kawi ka manbei ha uwi u manpa, u Joefresson Jana le sngi chwa wow tynyap u ya ki ar ngut ki khon ha Shillong.
Ka Chairperson yong ka Commission, ka Phidalia Toi ynne da ong ko wa ka manbei da lai ko cha ka Rynjah Police Station ha ka 27 Naisan wow ujor wa u kurim ko da dat u ka ha sarok heipor wa lai kreh ko tangwa ki pulit da ong ki wa ini toh i kaam yong yung wei da ong ki wa emkaam phah lai syllok (Counselling) ya uni u manpa.
Ka Phidalia da ong ko wa i rai ki pulit wow dam u chimkhia yeini toh iwa phylla khamtam wa uni u manpa toh uwa jooh leh ya ki kaam pyrchah aiñ wei uwa khlan dih kiad.
U Joefresson da tynyap u ya ki khon yong oo du hadien le sngi nadooh wa ujor ka kurim u cha ki pulit heiwa ka Phidalia da ong ko wa ini ym jia i ya kini ki khynnah lada ki pulit da leh ki yeiwa emkaam hajrong kani ka ujor na ka manbei.
Chooh chooh da ong ko wa ini iwa jia ya ki khynnah toh ka tput neibhah wa ka bei yong ki da lai ko cha thanat wow ujor yeiwa da leh u Joeferrson ya ka.
Ka MSCW daw kyntu ko ya u Montri wa ini i leh ki pulit wow kheiñstiñ ya iwon iwon ymtoh u pteiñ i wei daw phah leh wow pynchitom ya ki pulit wa kheiñstiñ ya ini i kaam.
Da ong ko leh wa ki kynthai ym jooh lai ki cha thanat khlem da toh iwa emkaam wei ki pulit ymtoh u kheiñstiñ ki ya iwon iwon i kaam.
Heiyatoh wa i daw wym em ujor da ka FIR da kani ka manbei pyrchah ya u Joefresson, ka Phidalia da ong ko wa em ki por wa ki bru ymkwah ki wow ujor FIR boi mih i maa wei em boon ki daw wa ki bru ymjooh ujor ki da ka FIR.
Neiliaang ka Coordinator ka MSWC, ka Annie Sohtun da ong ko wa ya ki kaam wa yatoh hapoh ki yung, ki pulit ye ki wow phah ya ka Case cha ki One Stop Centre wow leh ki yeiwa emkaam.
Ka Sohtun da ong ko leh wa kani ka manbei toh u yoh ko yei hok yong ka katkam ka aiñ Protection of Women from Domestic Violence Act, 2005.
Heiyatoh wa i slem ki pulit wow leh iwon iwon hadien wa ka manbei da ujor ko hadien wa wiar ki ar ngut ki khon ha i miet ka 29 Naisan, ka Phidalia da ong ko wa ki pulit toh u leh ki yeiwa emkaam pyn na ka 27 tarik pyrchah ya u pa hadien wa yoh ujor nyngkong.
Da ong ko wa ki pulit da toh wow chemdien ki yeiwa leh u Joefresson neibhah toh uwa jooh tba kti ya ka manbei.
