Hadien wa mih khubor wa da pyndam ka NEIGRIHMS ya duna 200 ngut ki Nurse hadien wa dep wow thung kreh pura da kiwi deiwa pynman ya ka Exam heiwa kini kiwa chah pyndam toh kiwa da thung lyngba kawi ka Agency wa tip kam ka Ranger Security & Service Organization (RSSO).
Neiliang u Harbour Lyngdoh uwa man u Deputy Controlling Officer ka RSSO da ong u wa nadooh wa sdang da dep wow pynsñiawthooh wei pynche chwa wa ya i kreh Nurse ha NEIGRIHMS lyngba yong ka Agency toh iwa chipor donhi.
Da ong u wa i chah pyndam noh ki Staff Nurse wa kreh ha NEIGRIHMS toh katkam ka hukum wa da pynmih na kani ka Hospital, hadien wa da dep jied ya ki Staff Nurse wa pura.
Da khana u wa ka RSSO da pynbiang ko kamwa 314 ngut ki Nurse ha NEIGRIHMS hapyrdi u snem 2016-17, wei na kini da pynsangeh noh hadooh 179 ngut ha ka thup wa da pynmih nyngkong, wei da khana u leh heijooh i por wa em ki kattu katni na kitai ki Nurse wa chah pyndam da chah thung pura syndon ki hadien wa da ye ki u lait ya ka Exam wa dang dep pynman ini wa dep.
Chooh chooh da ong u wa nadooh wa sdang da dep wow pynche cha kitu kiwa da e kreh ka Agency wa ini i kreh toh iwa du chipor wei ymtoh iwa tikna wa daw neh, wei da em ka ya soi ya ka Service Book kawa da batai che ya ki wakreh wym ye ki wow kam wa ki toh ki wakreh wa pura neibhah da thung ya ki lyngba yong ka Agency.
Kamtæ da ong u wa em i ktah ya ki Nurse kiwa da kreh waroh chi kattu wei neiliang ka Agency leh sñiawsih ko wow tip wa da em kiwa da chah pyndam tangwa da ong u wa kini ki Staff Nurse leh ki sñiawthooh ki yei rukom chah pyndam kreh ki.
