Ka kong Chiarmon Dkhar ka manbei wa em yei mynsien yoowyrai kawa na ka chnong Wapungskur, East Jaiñta Hills, ynne ka sngi da pyndep lut ko yei wow e yarap ya waroh ki manyung wa dooh wa duk ha ka chnong Wapungskur, East Jaintia Hills, kiwa da chah ktah joor nei khang chnong hapoh ka ri neidaw ka kjut khlam COVID-19, deiwa pynkut ynne sngi ha ka Dong Moopynieiñ.
Ynnin ka sngi, ka Chiarmon Dkhar da pteiñ biang ko yei e yarap yong cha ki thlu yung wa dooh wa duk sa ha ka Dong Tpepswer, Wapungskur. Ha kani ka dong, da em hadooh 88 tylli ki yung kiwa da yoh i yarap mar 15 kilo u khoo, u salah phareng wei blooh. Chwa u saam ya kini ki mar baam cha kitai ki thlu yung da yoh yei klam sñiawngooh wa tbiañ wei ngooh Blai na u Chairman yong ka dong Tpep Swer, u TBn. Tarson Siangshai.
Katwa ynne sngi wan, ka kong Chiarmon Dkhar, hei pteiñ i yong ka yeini ki kaam lehwyrai yong ka, da lai li e yarap chooh chooh ko sa ya ki manyung mansem wa dooh wa duk yong ka Dong Moopynieiñ, Wapungskur. Ha kani ka dong, da yarap hadooh 115 tylli ki thlu yung wa dooh kiwa da yoh yei yarap mar 15 kilo u khoo, u salah phareng wei blooh. Ha kani ka dong leh, kamjooh hi, chwa u saam ya kini ki baam, da yoh yei klam sñiawngooh na u Chairman yong ka dong, u Cheerful Ryngkhlem, deiwa pynbood won sei ngooh Blai na u TBn. Shatbha Ryngkhlem. Da ini i wan e yarap ka kong Chiarmon Dkhar sa ha ka Dong Moopynieiñ da pyndep lut chooh ko katkam wa man kattæ yei kaam e yarap yong ka hapoh yong ka chnong Wapungskur.
Katkam wa man kattæ iwa da yoh yukheiñ lang hadooh ynne ka sngi, da em hadooh kamwa 340 tylli ki manyung mansem wa dooh wa duk kiwa da yoh yei yarap sñiawbha da ki marbaam na ka kong Chiarmon Dkhar.
Kam wow pynkynmoo, ka kong Chiarmon Dkhar, kawa chong chnong yong ka chnong Wapungskur, da e yarap ko ya kiwa kam kitai ki manyung deiwa sdang nadooh ka 2 tarik uni u bnai na ka Dong Umchongpet, Wapungskur wei pyndep ya ini ynne sngi ha ka dong Moopynieiñ Wapungskur.
Discussion about this post