Ynnin ka sngi u DC ka East Jaiñtia Hills da khut yaklam u ya ki dkhot ka Jaiñtia Hills Truck Owner Asscociation (JHTOA) wa ki karkhana pynmih khyndaw-bilat wow bichaar bniah ya i dawa ka JHTOA hajrong i wym mano wei tyngkheiñ ya ka hukum ka sorkar da kini ki karkhana.
Ha kani ka yalang da rai wow e laad chipor wow pynbait ya ini i kaam hapoh ka 9 tarik uni u bnai heiwa neiliang ka JHTOA da dap ko dei chrai yeini i lehbor ki karkhana hakhmat u DC khamtam ka Star Cement wa da thied ko da ki spah tylli ki truck yong ka wow kit ya ki mar khlem yohbor na ka JHADC wei ini pynyoo che i wa ki karkhana ym kheiñkor de ki ya ki tre ri tre jylla.
Neiliang ka JHTOA daw chim ko ya i rai hadien ka 9 tarik uni u bnai neibhah wa u DC da pynsñiaw u ha ki dkhot ka JHTOA wa ki karkhana wa daw hap chong bichaar biang sa chisien ha ka 9 tarik wei da kyntu u leh ya ki karkhana wa hap bood ki ya ka hukum ka sorkar wa da pynmih ha u snem wa dadep heiwa ka bai kit hapoh ka jylla u man ko hei dor wa T. 7 chi ton ha ka chi Kilometer wei ki karkhana hap elaad ki hadooh kamwa 80% ya ki tre ri wow kit khyndaw-bilat na ki karkhana wei kamjooh leh wow wanrah wow booh biang ya ki kudam ha Byrnihat iwa da kyrriah noh cha Assam.
Neiliang u DC da phah u leh ya waroh ar liang wow chong pyrkhat ki sa chisien ha ki sngi wow wan wei wow bichaar biang ya i dawa ka JHTOA.
Ka JHTOA da beiñ ko ya ki karkhana wa da lehbor wei lehbeiñ ki ya ki tre jylla wei da tyngkheiñ ki ya ka hukum ka sorkar.
Ka JHTOA da ong ko wa ym chong kli-kti ko hajrong ini i leh ki karkhana heiwa lada ki bor sorkar ymye ko wow pynbait ya ini i dawa, ka JHTOA daw lai bait ko chaphrang da i yakhih pychah ya ini i lehbor ki karkhana.
