U Montri wa pait ya ka chnat Transport ha ka jylla, u Sniawbhalang Dhar da ong u wa ka chnat da e laad ko ya ki tre wa kiwa yah kari hawa yatoh wow pynyiñsur ya i su ya ka dan, deiwa maap ya ka kuna wei da e por leh wow ye ki wow su kyllooid deiwa pyrkhat yei eh wa yachem ki nei khangsbak.
Kam wow pynkynmoo wa ka Meghalaya Joint Action Committee of Commercial Vehicles (MJACCV), da dawa ko na ka sorkar wow maap ko ya bai kot kari da 50% neidaw wa chah ktah i kamai nei wan ka khlam COVID-19 ha u snem wa da dep wei kamjooh ha uni u snem.
U Montri da ong u wa kamwa man katni, ka sorkar da pyrchang ko wow yarap ya kiwa yah kari, tangwa hadien wei hadooh katwon daw chah ktah na u khñiang khlam ym pu ye ong iyi iyi wa kammon u lai chakhmat, deiwa pynrap wa hadooh katni ka chnat ym em daiñ kuna ko hawa yatoh wa ki kot kari.
U Sniawbha da ong u wa ka sorkar ka sñiawthooh ko yei eh, wei lada toh i por daw yaklam biang, tangwa da pynrap u wa ha kam ini i por ym toh du kiwa yah kari kiwa maad yei eh neibhah waroh ki paidbah em ki hapyrdi i eh nei chah ktah wei chah kdoh chah khoom ha ka kamai kajih, deiwa ong u wa ka sorkar daw pyrchang ko wow pait yei eh yong ki paidbah katwa ye.
