Ka National People’s Party (NPP) wa yahkhmat ya ka Executive Committee hapoh Khasi Hills Autonomous District Council (KHADC), ye ko wym pynyakhun de ya ki kattu kanti ngut ki MDC kiwa katni ha ka Election kawa daw pynman.
Ka NPP kamwa man kattæ em ko 16 ngut ki MDC hapoh KHADC, tangwa napyrdi kini kamwa 4 ngut ye wow man wym yakhun ki, wei em leh ki wym kwah de wow yakhun wei em won wa ka Party ym pynyakhun ko.
Katkam ka khubor wa da yoh lum, uwi na ki kyrtong u wym mih pyrtuid ha ka thup yong ka NPP toh u MDC na Jirang, u Victor Ranee wei uwi won toh u MDC na Sohïong-Nongspung, u Sherbor Mawlong.
Hawa yatoh wa u kyrtong MDC na Jirang, da yoh khubor wa na katai ka Constituency, ka NPP daw sai noh ko da u MLA wa katni, u Sosthenes Sohtun.
Ha ka tayaaw wa dadep da sakhi yei lai psiah Congress boon ngut kiwa kyrchaan ka NPP na Jirang, wei ini i lai chwa kiwa kyrchaan ye ko wow man nei phrat luti u MDC wa katni yow yakhun noh na ka Congress ha ka Election wow wan hadien wa da sñiawthooh wym yoh Ticket de ha kani ka kynti na ka NPP.
Hawa kyruiñ won cha Sohïong-Nongspung, da khana wa u Sherbor da paan Ticket biang u tangwa da em ar ngut kiwa yahkhmat ka seiñ kiwa da paan Ticket kiwa da ye u man i daw wei eh ya u MDC wa katni wow yoh Ticket biang.
Kam wow pynkynmoo wa u Sherbor da jop u ya ka Election MDC ha u snem 2019 na ka seiñ HSPDP wei da lai psiah u cha ka NPP hachwa ka Election MLA 2023.
Kawi won ka Constituency kawa ka NPP ym sai ko da u MDC wa katni toh ha Mawshynrut kawa da mihkhmat da u Gigur Myrthong.
Katkam ka khubor da ong u wa u Gigur hi wym kwah wow yakhun Election hanla kiwa boon kiwa kyrchaan dang pynsñiaw ki yei chaniah ha oo lada yakhun u. Neidaw wa ini i kyntait yong u MDC wa katni, neiliang yong kiwa yahkhmat ka NPP Mawshynrut Block da rai ki wow phah dei pyrtuid u Working President ka NPP yong katai ka Block, u Cardinal Sohshang.
Najrong kini, ka Rambrai-Jyrngam leh toh kawi ka Constituency kawa ka NPP ye ko wym sai de da u MDC wa katni, u Bajop Pyngrope, wei heithaw yong oo daw sai noh da u MLA warim katai ka Constituency, u Kimfa S Marbañiang.
Hanla ka khubor na kiwa yahkhmat ka NPP da pyntikna wa i tyrwa toh ya u Kimfa wow man kam u kyrtong, tangwa neiliang u Bajop wa u Kimfa ym bien ki wow pynthikna næ wow klam iyi iyi deiwa ong donhi wa i yaklam hapyrdi yong ki dang lai ko.
Discussion about this post