U Symbood Montri Rangbah ka jylla, u Sniawbhalang Dhar da ong u wa ka chnat pynroi sor da sdang thooh ko ya ki thaw wow kyrriah ya kiwa chongdai madan na thaaiñ Khyndailad ka sor Shillong.
Da ong u wa em 2-4 tylli ki thaw wa da tipmit wei chisien wa biang liang wanang daw kyrriah noh ya kiwa chongdai madan cha kini ki thaw yow pynman ya ka Khyndailad kawa kyllooid.
Chooh chooh da ong u wa ka thaw pynyieñ kari ka MUDA ha Anjalee toh kawi na kitæ ki thaw wa da pyrkhat yow pynemkaam neibhah katkam wa man katni em 200-300 ngut kiwa chongdai madan ya kiwa daw kyrriah noh ka chnat pynroi sor.
U Sniawbhalang da ong u leh wa lait na ka Khyndailad, dang thooh luti wow pynman ya ka Motphran wa Laitumkhrah kam ki thaw wym em wa chongdai madan namo ki Hawkers Free Zone kam chibynta wow pynmiat ya ka sor Shillong.
Heijooh i por da ong u wa ini ym mut i wow iehbeiñ ya kiwa chongdai madan tangwa emkaam leh u yoh yei thaw wa biang ya ki wei yeini i kyrriah ya ki daw pyndep smat noh ka sorkar chwa u kut u Naiynru uni u snem.
Discussion about this post