Jowai: Ynnin ka sngi da mih ka wyrta wa da hap khang chwa chipor ya ka yung krehkaam u SP ka East Jaiñtia Hills kamjooh leh ka Khliehriat Police Station waka Women Police Station hadien wa yoh COVID-19 ki kattu katni ngut ki pulit wakreh ha kini ki thaw.
Ynne ka sngi da yoh yutip wa da em ki kattu katni ngut ki pulit ka West Jaiñtia leh kiwa da hap chongkset (Quarantine) hapoh ka District.
Hawa yaklam wa u SP, ka District,u Bikram D. Marak da pyntikna u wa em ki kattu katni ngut ki pulit kiwa da hap chongkset ha ka District hadien wa em i yajan ki wa ki kattu katni ki bru wa suba wa yoh ya uni u khñiang wei i phah chongkset ya ki toh kam ka laad yada donhi namo ka Precautionary Measure wei ka Test da pynyoo ko wa ym pu em wa yoh COVID-19.
Da pyntip u leh wa lada ki pulit ym em thaw chongkset ki ha yung katkam ki kyndon wa emkaam, neiliang ka chnat da booh ko ka thaw wow leh Quarantine kawa em ha Police Reserve.
Chooh chooh u Bikram da pyntip u wa da leh ka chnat yeiwa emkaam wei da yaklam ki leh dei langær wa ki bru ka chnat i chait i khiah.
Da pyntip u leh wa ym em u sangeh i krehkaam ka chnat pulit hapoh ka District wei waroh ki yung krehkaam yong ka da man ki kiwa kreh pura.
Heijooh i por da pyntip u leh wa ha waroh ki yung krehkaam ka chnat hapoh ka District da booh ya ki Help Desk namo ki miej wow e yarap ya ki paidbah khnang wow lait ki paidbah u psiah chapoh ki yungkrehkaam.
