Ka synjuk kiwa sikai Meghalaya Upper Primary School Teachers Association (MUPSTA) Central Body da pynman ki ya ka Central Executive Committee (CEC) ha ka 8 tarik uni u bnai ha New Hope Restaurant, Barik, Shillong heiwa da iwi i yumut da chim yei rai wow pynman da ka yakhih deiwa chong kyllaiñ myngngor (Sit- in-Demonstration) ha ka 17 tarik uni u bnai ha rood u sarok All India Radio, Shillong (mar pyrchah ya ka Raj Bhavan) nadooh 11:00 waje i step.
Kani ka yakhih chong kyllaiñ myngngor da pynman yow pynyoo yei wym sñiawhun yei leh mylliñ yong ka sorkar yei dawa wa chongnia yong ka seiñ wow pynku Deficit noh ya waroh ki 844 tylli ki Adhoc Upper Primary School ha Meghalaya.
Ka seiñ da ong ko wa ka sorkar da dep ko wow kular wow pynku noh ya kitai ki skur ha ka Teacher’s Conference kawa da man ha Asanang, Tura, West Garo Hills ha u snem 2018 tangwa hadooh katni ym pu yoo ki dak iyi iyi leh wa ka sorkar daw chimkhia ko ya itai i eh yong kiwa sikai skur.
Da ong leh wa ka seiñ la kammon kammon leh ym pdiang ko yei klam u Montri ka chnat Puræ Puthi, u Lahkmen Rymbui uwa da ong bait wa ka sorkar ym ye ko wow pynku Deficit ya waroh ki 844 tylli ki Upper Primary School ha Meghalaya.
Kamtæ ka seiñ ka kyrpaad ko ya waroh kiwa sikai Upper Primary School wa em ha Meghalaya kiwa em hapoh ka chatri yong ka MUPSTA waroh kawi wow sñiawbha ki wow ya mih ryntih ha katai ka sngi khnang wa ka sorkar u yoo ko wa kiwa sikai da chem sakhiat ki yei eh wei da emkaam yei yarap wa jhan yong ka sorkar yow ye u im lang kam kiwi ki para wakreh.
I pyntip na u E.G. War, Organising Cum Publicity Secretary MUPSTA Central Body.
