Kam chibynta yong ka thong ‘No one shall be left behind initiative’ ka Society of Urban and Rural Empowerment (SURE) deiwa ya krehlang waka North East Slow Food and Agro Biodiversity Society (NESFAS) da pynman ki yaka Agro Biodiversity Walk (ADB) namo ka lai kjat yow yoh yei yutip kamjooh i sikai chaphang i spah ka rymaw kawa da pynman haka 4 tatik uni u bnai haka chnong Mulum, WJH. Heiwa ya ini waroh da pynman cha lait, cha kpær wa cha ki khloo deiwa bood yaki kyndon sorkar.
Iwi na ki thmu toh wow sikai ya ki khynroo khyllood chaphang ki jhoor, ki soh wa ki dawai kynbat kiwa em haka chnong Mulum kawa haap hapoh ka Laskeñ Block.
Kiwa ya chimbynta ha ini i lai kjat toh ki dkhot yong ki Youth Club næ ki seiñ khynroo, ki dkhot yong ka Participatory Guarantee System (PGS) Group wa ki dkhot yong ki Self Help Group (SHG) kiwa em ha kani ka chnong, heiwa da chimbynta 30 ngut ha kani ka lai kjat kawa sdang nadooh na kpær yung wei da lai won cha ka khloo wa em hajan yong ka chnong wow pyntipmit wei wow lum yutip chaphang ki baam tynre.
Arngut kiwa ksoh yei stad tynre hapoh ka chnong kiwa kynthup ya ka Reviancy Suchiang kawa em 56 snem i rta kawa man leh ka dkhot yong ka Agro Biodiversity Learning Circle (ALC) kamjooh ka dkhot ka PGS wa u Marki Lamare uwa em 25 snem i rta uwa man leh uwa e dawai kymbat da man ki kam kiwa yahkhmat kani ka lai kjat kiwa da pynyoo wei e hikai ya kiwa chimbynta chaphang ki baam tynre wa ki dawai kymbat.
Ka Reviancy Suchiang da ya chimbynta ko wow khana chaphang ki jait thung wa em ha kani ka thaaiñ kiwa ki bru pynemkaam ki wow baam. Kini kynthup ya kiwa yoh na ki kpær wei kamjooh leh kiwa mih ha khloo. U Marki Lamare won uwa yoh pateiñ ya i rukom e dawai kynbat da pynyoo u ya kiwi ki jait thung wa pynemkaam wow chna dawai. Ha ini i lai kjat da pyllang wei da booh hei thoh hadooh 25 jait ki jait thung, 9 tylli ki jait jhoor wa i baam khloo wa 5 jait ki kynbat dawai. Ki jait baam kynthup leh yaki dathli kiwa da yoh na ki lyngkha.
Kiwa ya chimbynta kam ka Risa Synnah (18 snem) da pynsñiaw ko yei sñiawkmen wa da yoh u chimbynta ha kam kani ka esikai wei lyngba ini da sñiawthooh ko wa kammon u pynneh pynsah ya i spah rymaw.
Ka Dawanroi Suchiang (17 snem) won da ong ko wa katni ki khynroo khyllood ym tip de ki wow burom yaka rymaw deiwa e nongmuna wa hawa khait soh ki, heithaw wow khait du ya u soh, da ah lang ki yaka chnat u dieñsoh.
