Jowai: Ki dkhot ka NCC ka Thomas Jones Synod College chirup wa ki dkhot ka NCC ka Government Girls Higher Secondary School wa ka NSS Unit ka Thomas Jones Synod College ynne ka sngi da pynman ki ya ka lai paidbah kam chibynta ka Swachh Bharat Mission yow pynkynmoo ya ki paidbah wa emkaam u man ki kiwa lehkhooid hanla em ki heiwon heiwon leh.
Ya kani ka lai paidbah da sdang na Thomas Jones Synod College wei da em chwa ka yalang wa tbian chwa wow sdang ya ka heiwa u Vice Principal ka College u H. Nongpluh da ong u wa dang emkaam hi u leh ya kam kani ka pynsniawthooh paidbah neibhah ha kiwa boon ki por wa mih ki khynnah skur wow pynkhooid chnong du hadien kattu katni kynta da em wot kiwa wan pyntaroi biang ya i thaw wa da dep pynkhooid.
Ha kani ka lai paidbah da em leh ki dkhot ka JSU wa ka President ka Jowai Traders Association (JTA) ka R. Mylliempdah wei manda poi ha Iawmusiang da sangeh wow e wyrta cha paidbah da u President ka JSU u Rikut Parein uwa da ong wa i lehkhooid wanrah ko leh ya i chait i khiah wei emkaam u chong ko ha ka pyrkhat pyrdaiñ yong i wa ymtoh u myllien de i u pyntaroi ya ka chnong ka thaw.
Kani ka lai kjat manda poi ko ha Yawchyiap da sangeh biang heiwa ka President ka JTA da klam ko deiwa pynkynmoo ya kiwa chong dai wow man ki kiwa lehkhooid neibhah ka Iawmusiang toh ka dur yong ka chnong Jowai heiwa kiwa wan daw yoo nyngkong ko ya ka wei lada man ko kawa tngit waroh ka Jowai leh da yoh naam ko kawa tngit.
Chooh chooh da ong ko leh lada ki thaw chong dai man ki kiwa khooid ki paidbah leh sñiawsuk ki wow thied tiar hanlada i dor leh syad i.
Ya kani ka lait kjat da pynkut ha Government Girls Higher Secondary School heiwa tymbud luti kiwa chim bynta da kbai da kyriaw ki wymhoi u noh jhep cha sarok cha syngkieñ wei da rah lang wa ki Placard wa em ya ki kyntien sneiñ.
Discussion about this post