Ka KSU Wahiajer Unit da pynman ko ya ka pynkhooid chnong namo ka Cleaning Drive ha ka 31 Kmaichonglad 2021 ha chnong Wahiajer.
Chwa u sdang i pynkhooid da em ka yalang wa tbian hapoh ka yung krehkaam ka Chnong Wahiajer heiwa da em kiwa kitkaam chnong nadooh u Chairman ka chnong, u Samson Lamare, Secretary Chnong u Andrew Sari, Waheh Chnong u Sanwotki Laloo wa kiwi kiwi.
Neiliang kiwa kitkaam chnong da dap ki dei mynsien wa kmen hawa em kam kini ki khon ka chnong kiwa yoo jngai neibynta i bha i miat, heijooh i por da kyntu ki leh wow khrehlang chirup wa ka chnong ka thaw khnang wow ye u lai bait i kaam hapoh chnong.
Ha kani ka sngi da sdang ya i pynkhooid ya ka chnong nadooh na Iawpynsin hadooh ha Stadium Wahiajer hapoh i yahkhmat kiwa kitkaam ka KSU Wahiajer Unit nadooh u President u Rimiki Sari, Secretary u Dayowanki Pale chirup wa ki dkhot ka seiñ kiwa da kyntu leh ya kiwa chong chnong wow man ki kiwa lehkhooid jar jiar i khmat yung khnang wow man ka chnong kawa khooid wa pliah.
Ka seiñ da e sñiawbha ko leh da ki Dustbin cha ka Dorbar Chnong Wahiajer khnang wow yoh u pynemkaam hapoh ka yung krehkaam chnong kamjooh leh da wah ko ya ki Dustbin ha ki rood sarok ka chnong.
