Ka Sarot I Man deilang wa ka Jowai Civil Hospital Blood Centre da pynman ki ya ka Awareness cum Blood Donation Camp ha Jowai Civil Hospital Blood Centre, iwa em hajan ka Panaliar Secondary School, Jowai ynne ka 12 tarik kam kawi na ki bynta wow lehwarom ya ka lyngkhooh sngi yap u Pa Togan Sangma.
Ya ka yalang wa tbian da pynlai da u Barlee Moore Shilla, dkhot ka Sarot I Man (SIM), uwa da pyntipmit ya ki dkhot waroh heijooh ipor pynsñiaw u leh ya ki kyrdan wa ki kaam waphær waphær yong ki. Da yoh leh ya i klam na uwi na ki dkhot ka SIM, u Kyllimot Lhuid, uwa da batai bniah heiyatoh wa ileh pynman ya ki wow e snaam wei ya i lai luti yong ka seiñ ki ha ki kaam wabha neibynta ka imlang sahlang.
Ha chwa, da yoh ya i ngooblai na u Sienmitre Sumer, u dkhot ka SIM, katwa ya i klam bniah heiyatoh wei myntoi nei e snaam wei wa pura, da e da ka Dr. Patricia Shylla, MO ka JCH Blood Centre.
Da e ko i yaroh ya kiwon kiwon ki Blood Donors wei kyrpang leh ya ka Sarot I Man, kawa dawan e snaam kattu la le sien heini i thaw. Da ong ko, lym em ki kiwa e snaam, ym man ka Blood Bank kawa krehkaam pura. Da batai bniah ko wa kammon wahoi næ wymhoi u chim ya i snaam na u bru næ ka bru, deiwa kyntu leh ya kiwi wow wan chaphrang wow yarap u pynim ya kiwi deiwa e snaam.
U kongsan ha kani ka sngi, u Dr. Ebenezer War, Medical Superintendent, MCH Jowai da e yaroh u ya ka Sarot I Man, deiwa ong u wa sñiaw emdor bha u sñiaw yong ki 11 ngut ki dkhot ka SIM, watoh man ki ki bru kiwa daskem i thij pyrkhat wei da em ki kyrdan waphær waphær. Da khana u yei wa sdang ya kani ka Blood Bank nadooh u snem 2014, “Ha-oo, nadooh ki snem nachwa da yaleh u paan wow yoh u wai ya ka Blood Bank, tangwa ymye ka sorkar u wai”.
Da ong u wa i em kani ka Blood Bank, pynmyntoi ko ya chiboon kiwa emkaam yarap, neibhah ha ki por nachwa, chiboon kiwa li yah li booh ya ki wakjut næ mynsoo, tangwa manda ong u e snaam, waroh yayut ki neidaw wa tieñ ki, katni won da sñiawthooh ki bru, datip ki kammon u yarap deiwa e snaam cha ka Blood Bank, neibhah kani hi man ko ka i yarap ya ki mynsien ki wymtip yei yi. Da e u i kyrkhu kyrdoh ya ka Sarot I Man yoh ko u tia chaphrang ha ki kaam wabha yong ka, weiwa yooluti u wa daw boon chooh ki dkhot yong ka kiwa em i jooh i thmu kamwa em kini kiwa sdang ya ka.
Da yoh ya ki kyntien e khublei na u Jait Dao Sumer, dkhot ka seiñ deiwa e khublei kyrpang u ya kiwa e snaam ynne, u Oliver Shadap Passah, u Barlee Moore Shilla, u Kyllimot Lhuid, u Sienmitre Sumer wa ya u Mariabud Paswet.
Ka SIM da pyntip ko wa em leh ki lok kiwa da kular wow wan e snaam lang ha kani ka sngi, tang na ki daw wa sahkut kari ymye de ki u wan.
Da saam leh ya ki Certificates cha waroh kiwa da e snaam ynne kam ka dak wow pynchlur ya kiwi leh u wan chakhmat neibynta ini i jooh i thmu wa bha.
