Da i thang mombati ha Shillong da kynmoo warom ya ki le ngut na Amlanai kiwa chah tynyap

Shillong: Kam ka dak wow wyr’ai wei wow beiñ yei chah tynyap khiar ki le ngut na chnong Amlanai wa kynthup ya u Waheh Chnong u Thomlin Surong, u Secretary Chnong u Hamboi Langshiang wa u Shan Khongiong uwa na kani ka jooh ka chnong, neiliang ki khynroo khyllood ka War Jaiñtia ynne i janmiet da pynman ki da i thang mombati ha Khyndailad (Police Bazar) Shillong heiwa da emlang leh ka JSU – Shillong Circle wa ka HYC Seiñbei.

Ha kani ka yalang da pynlai da u Treiborlang Raul Suchen wei da emlang leh u khon yong u Waheh Chnong ka Amlanai wa ki ar ngut ki waheh kiwa da lait-im na i jia ha ka sngi wa chah tynyap ki le ngut ha chnong Trangblang, WJH.

Ya kani ka janmiet ynne ka sngi da yoh u sakhi wa emlang leh da ki spah ngut kiwa da wan embynta ha kani ka kynmoo warom wa kynthup leh ya ka seiñ kam ka Synjuk ki Nongsynshar Shnong ka Bri U Hyniewtrep wa ki Synjuk ki Waheh Chnong Ri Jaiñtia wa kiwi kiwi.

Da yoh leh yei klam na uwi na kiwa lait-im na ini i jia uwa da ong wa lada ka sorkar pynlait jamin ko ya kini ki bru thrang snaam, oo pyn da oo hi wow pynkut noh yei mynsien u ha u tylle pasi wei kini ki kyntien yong oo da pynjoo umkhmat ko ya waroh kiwa em ha kani ka thaw.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Da yoh leh yei klam na u Rap Blah, General Secreatary ka Synjuk Nongsynshar Shnong ka Bri U Hyniewtrep wa na u Pdiang, General Secretary ka Synjuk ki Waheh Chnong ka Ri Jaiñti, kiwa da beiñ yeini iwa jia, wei da yoh leh yei klam na u Lawyerson War, President ka JSU, u Robert Kharjahrin, President ka HYC wa kiwi kiwi.

Ki khynroo wa ki khyllood kiwa na War Jaiñtia wa chong wa sah ha Shillong kiwa da embynta wow e klam ha kani ka janmiet kynthup ki ya ka Mardikordor Pohchen, Dewan C Bareh, Laikirang Nonglamin, Bankerlang Lamurong, Shailang Suliang, Franky Myrchiang, Groswell Suchen, Tipsngi Rymbai wa kiwi kiwi.

Kini ki khynroo khyllood da pyrchah ki yei wow chim yei mynsien bru deiwa pynrap leh wa kam ki bru ymtoh u chim ya ka aiñ ha kti wei ymtoh leh wow pynksan ya kiwa tynyap bru neibhah wa i ya-pynmynsoo ym man i i jubab wow poi chawa bha.