Ka Seiñ Raij Raliang kawa pait wa kdup ya ki khon Niamtre hapoh ki thawanær yong ka, da kani ka wyrta pathai ko cha waroh ki khon Ñiamtre yong ka chnong Raliang kiwa lai puræ, kiwa lai khih lai kreh cha sor cha palat sor ka chnong Raliang wa ka Seiñ Raij Raliang kamwa jooh pynman ko ya ka yachemlang yong ki khon Niamtre khlieh u snem, kamtæ myntu u snem leh daw pynman biang ko ya kani ka yachem lang ha ka 23 tarik wa ka 24 tarik December 2025, ha Madan Seiñ Raij Chrah-Umphula Raliang.
Kamtæ ha ka 23 tarik daw pyndep chwa ya ka Kñia Chrah nadooh i por 8:00 waje i step, kamjooh leh u pynman ya ka Yakob Chaad yong idæ, ka Yapooh Syiar, ka Yaleh Moina, ka Mareh Lama, ka Yahaai, ka Stingkoh, ka Yaleh Deiñ-dok, ka Yalai Kæn-Kæn wa kiwi dæ.
Katwa ha ka 24 tarik u pynman ya ka chaad yong idæ chirup lang wei klam i sneiñ na ki waheh wa sian heiyatoh wa ka Niam ka Rukom ka Dustur Riti yong ka jaitbru Pnar yong i, heijooh i por daw pynman wa ka pynyoo yei sap i kup yong idæ da ki manbei manpa wa ka Chaad Kpær Syntu yong ki khynroo kyndaiñ heipor miet.
Kamtæ da kyrpaad ya phi waroh ki khon Niamtre yong ka chnong Raliang kiwa da wan cha chnong u sñiawbha phi u yawan cha kani ka yachemlang yoh phi u yachem kam ki para khon Niamtre chisien chisien ha kani ka yalehke yong idæ kawa yoh pateiñ wa e pateiñ da ki ma ki woh ki warim wa jah yong i.
Discussion about this post