Ka Confederation of Meghalaya Social Organisation (CoMSO) ynne ka sngi da rai ko wow pynjoor ya i yakhih dawa Inner Line Permit ha ka jylla, wei wow pynbor ya u Lat ka jylla wow e ka muhor ya ka Meghalaya Residents Safety and Security Amendment Bill, 2019.
U Robertjune Kharjahrin uwa man u Chairman ka CoMSO da ong u wa kani ka dhab ki seiñbhalang da rai ko wow pynman da ka yakhih ha ka 21 tarik uni u bnai, kawa man ka sngi lehkmen yei yoh ya ka jylla namo ka Meghalaya Day.
Da ong u wa kani ka yakhih toh wow pynsñiaw yei pyrchah neibhah wa ka jylla da dap ko 49 snem tangwa ympu biang ko u pood wei ka jylla ympu em ko ya ki aiñ yada ri, deiwa pynrap leh wa em ki aiñ wa da rai da ka sorkar jylla tangwa ka sorkar India ym burom ko ya ki kam hei wow e ya ka ILP kawa man ka rai wa da chim da waroh 60 ngut ki MLA.
Da ong u leh wa i yakhih ka CoMSO ym mut i wow khang ya kiwa kwah u lehkmen, heijooh i por u Chairman ka CoMSO da khut u leh ya waroh ki MLA, MP wa MDC cha ka yakhih wow pynyoo wa ka jylla emkaam ko yei yada neibhah hadooh 49 snem leh i angnood ka jylla dang sah i hei langoh.
Da ong u wa ka sorkar India kamwa burom ko ya kiwi ki jylla wow e ya ka ILP, kamtæ ka jylla Meghalaya leh emkaam ko ya kani ka aiñ wow yada wei emkaam ko leh wow burom yei dawa ka jylla.
Heijooh i por, kam chibynta wow lai chaphrang wa i dawa ILP, ka CoMSO daw lai ko kylleiñ ka jylla wow phyllu yumut wa kiwa yahkhmat chnong, Raij, kur wa kiwi kiwi kammon wow lai chaphrang wow pynkhlan ya ini i dawa.
Da ong u wa dei chimbynta yong ki paidbah na waroh ki liang khamtam na kiwa yahkhmat chnong u man i kam ka dak wow pynyoo ya ka sorkar India hajrong ini i emkaam.
