Da i yung thymme yoh ka beipun wa psa ya 3 ngut ki ksu kiwa da khlaad noh ka bei

Haka 26 tarik uni u bnai, i angnood ka Lily Tariang kawa chong chnong ka Hawai Bhoi wa em hapoh ka Amlarem C&RD Block, West Jaiñtia Hills District da man sakhiat i heiwa u Additional Deputy Commissioner uwa man leh kam u Project Director ka DRDA West Jaiñtia Hills, u F.B. Basan deilang wa kiwi kiwa ya krehlang da e kti ki yei yung wa pura iwa dang dep chna thymme yow yoh ki u mih noh nei yung warim iwa da sih da jæd.

Ya ini i yung da chna hapoh ka Pradhan Mantri Awas Yojana-Gramin (PMAY-G) deiwa yarap ka Jaintia Hills Development Society (JHDS) lyngba ka KHUBLEI Germany deiwa kyrchaan kiwi kiwa da yarap wow pynmih poisa Rs. 3,32,000. Kani ka poisa toh Rs. 1,30,000 naka PMAY, Rs. 20,000 naka MGNREGA, Rs. 1,70,000 naka KHUBLEI Germany wa Rs. 10,000 naka Pynskhem Village Organisation (VO).

Ha kani ka yung daw sah ka Lily deilang u kurim ko wa ki le ngut ki ksu wa pait wa psa ki kiwa da dooh noh yaka bei yong ki.

U F.B. Basan da pyntip u wa ka PMAY (G) toh ka Scheme ka sorkar pyrdi yow chna yung ya kiwa dooh wa duk wa em cha palatsor. Kamtæ ya ini i yung leh da chna hapoh kani ka Scheme wei da man i iwa ar iwa da leh deiwa ya krehlang waka JHDS, heiwa iwa nyngkong toh iwa da chna ha chnong Moosakhia iwa da e kti cha kawa yoh myntoi haka 23-12-23. 

Related posts

Lai kjat ki waheh wa ki khynnah na Dkhiah West chadooh cha u mot u Kiang Nangbah

March 23, 2024

Pynphooh ka Loompyrdi Iongpiah ya ka sngi ki kynthai deiwa pdiang burom ya ka Ridamaya

March 8, 2024

Da ban joor u yei emkaam wow ya krehlang yow yoh yei roi i paar kamjooh yow poi cha ka thong. 

Da pynsñiaw u leh yei sñiawngooh yaka KHUBLEI Germany lyngba ka JHDS yei e yarap ki kamjooh yei ya krehlang yow chna yung ya kiwa dooh wa duk, wei da kyrmen u wa ini i ya krehlang u pteiñ i leh ha ki snem wow wan. 

Da e khublei u leh ya u Block Development Officer, Amlarem, kiwa yahkhmat chnong wa ki Village Organisation (VO) kiwa da yarap wow pyndep u chna ya ini i yung du 90 sngi donhi.

Neiliang ka Lily wa u kurim ko da pynsñiaw ki yei kmen ya ini iwa da yoh yarap kamjooh ya waroh kiwa da e yarap. 

Da ya sakhi lang yeini wa u SDO ka Amlarem Civil Sub-Division, u Dr. Abhiskek Saini, u Amlarem C&RD Block Development Officer, u GLC Mylliem, u Fr. Manbha Pakem, Director JHDS, kiwa kreh ka MSRLS, ki dkhot ki SHG wa kiwa chong chnong.