Ka North Eastern Indira Gandhi Regional Institute of Health & Medical Sciences (NEIGRIHMS), Shillong da chah jied wei da pynbna da ka National Medical Commission (NMC) wow man ko leh kam ka Regional Centre (RC) for Medical Educational Technologies (RC-MET).
Ha ka 11 tarik uni u bnai nadooh 11:00 waje i sngi, ka Dr. Aruna Vanikar, President yong ka NMC hapoh yong ka Graduate Medical Education Board daw wai ko ya kani ka Regional Centre ha NEIGRIHMS. Kani ka Regional Centre for Medical Education Technologies (RC-MET) daw hikai ko ya ki Doctor kiwa e sikai ha ki thaw puræ Doctor ka thaaiñ mihsngi wa kiwi ki thaw ka ri India katkam wa da phah da ka NMC.
Ha ka yalang, ka Dr. Aruna Vanikar daw pynlait ko leh ya ka kot ‘English-Khasi Translation In Medical Practice With Khasi-Hindi Transliteration And Phonetics’ kawa da pynmih da ka chnat yong ka Medical Education chirup wa ki Doctor ka NEIGRIHMS. Kani ka kot daw em ko ya ki kyntien wa da pynkylla nei pharæng chei Khasi wa jooh pynemkaam da ki bru wa thooh dawai wa ki Doctor heiyatoh wa i kjut i chitom ki bru wei ini daw yarap i chiboon ya ki Doctor wa puræ kamjooh kiwa kreh ha i chait i khiah ki wym tip yei ktien Khasi.
Kiwa boon ki bru wa em i kjut i chitom kiwa wan ha NEIGRIHMS boonsien klam ki dei ktien Khasi wei kiwa wan puræ Doctor won wan ki na kylleiñ ka ri wei kani ka kot daw yarap ko chiboon ya ki khynnah wa puræ ki wym tip yei ktien Khasi.
Da i yahkhmat u Director ka NEIGRIHMS, u Prof. Nalin Mehta, uwa man leh uwa stat ha ka Medical Education Technologies, ka NEIGRIHMS da em ko i raikut wow pynkrehkaam yeiwa angnood ka NMC wow pynmih ya ki Doctor kiwa chkeh wa kiwa pura ha waroh ki liang ym du ha NEIGRIHMS tangwa ha ka thaaiñ mihsngi hi waroh kawi.
