Khliehriat: U Deputy Commissioner ka East Jaiñtia Hills District ynne da pynbna u wa khnang wow yada nei poor ka khlam u COVID-19, wow yaleh u dam u lai u wan deiwa bood ya ki kyndon wa da booh ka sorkar.
Da ong u wa ki yaw wa ki chakri khamtam ki kaam wymtoh u sangeh kiwa haap hapoh ka Essential Commodities kam i phñiang, dawai, mar baam, wa kiwi kiwi em hi ki ha District wei man ki kiwa wai.
Da rai wa da jied 9 tylli ki thaw wow dai ya ki mar wymhoi u dooh (Essential Commodities), kini kynthup ki ya ka Saipung heiwa daw wai noh ha ka 30 tarik uni u bnai nadooh 10:00 i step hadooh 3:00 i sngi.
Ha Kongong wa Samasi u wai ki ha ka jooh ka sngi nadooh 10:00 i step hadooh 2:00 i janmiet.
Ha Umkiang Parking Lot wa Lumshnong Playground u wai ha ka 31 tarik uni u bnai nadooh 10:00 hadooh 2:00 i sngi.
Ha Rymbai Road wa Umpleng (Cement) u wai ha ka 1 Naitung (Apr) nadooh 10:00 hadooh 2:00 i sngi.
Chooh chooh ha Lad Rymbai Bypass wa New DC’s Office Campus u wai ha ka 2 Naitung (April) nadooh 10:00 hadooh 2:00 i sngi. Kini ki thaw daw man ki kiwa dai mar neibynta ki chnong wa yajan wa ki.
Waroh ki chnnong da kyntu ya ki wow pynemkaam ya ki VDP/Youth Volunteer wow yarap ya ki pulit wow pynjngai ya ki bru iwi na iwi (Social Distancing) heipor wa wan thied mar ki na kini ki thaw. Toh u pyntikna ki leh wa ymtoh u mih i awri næ i tieñsar.
Waroh kiwa dai mar toh u jngai ki 4 meter na iwi iwi ha kini ki thaw wei kiwa dai ymtoh u dai ki palat yei dor wa da booh wei ye ki u chim du T.1 (chi tyngka) kam ka bai kit mar (Transport Cost).
Toh u booh leh ya ki thaw noh jhep wei wow pyntikna wa ki thaw man ki kiwa khooid wei kiwa dai toh u wan ki chwa ka 9:00 i step wow pynkhreh wow dai ya ki mar.
Discussion about this post