Uwa yahkhmat ka Congress uwa man leh u MP ka Tura, u Saleng A Sangma da ong u deiwa em ka Election chiteiñ samoi ha Gambegre da chah sneiñ wei chah pynbor ka sorkar wow hiar cha madan, heiwa da ong u wym phær la ka Congress jop næ rem ko, tangwa da chim chwa u wa daw yoh yei jop ha ka Election.
Da ong u wa ym pu jooh yoo ya u Montri Rangbah wow lai psiah u wot ha ka Constituency yong oo hi leh tangwa ha kani ka Election ha Gambegre da lai kynthih lut u cha man ki thaw wym toh u lai u leh.
“Du neidaw wa ka kurim yong oo, da lai u ha man ki tyngkong yung, ki dong wa ki kyntoit. Nga kmen O wa lyngba ka Gambegre Election da pynbor ya ki wow hiar cha madan yow yoo ki yeiwa sakhiat yeiwa ki paidbah tyngkhooh ki,” da ong u Saleng.
Katkam i ong u u Saleng, waroh ki Montri sorkar, u Lamphang ka yung dorbar wei awjan waroh ki MLA da la psiah lut ki cha ki kdong ki chmiang ka Constituency yow lai khroh ya ki Vote.
Da ong u leh wa kani ka lai yalap Election yong ki khlem da kheiñ de ya ki kdong ki chmiang pynyoo wa ka NPP da chah pynmaa wei sñiaw sier ko yei bor ki paidbah.
“Ki paidbah ha Gambegre da jop sakhiat ki ya kani ka Election nadooh kattæ; jooh yoo hi phi wa u Montri Rangbah, u Lamphang, u Symbood Montri Rangbah wa waroh ki Montri sorkar u lai psiah ki cha kawi pa kawi ka thlu yung du ha kawi ka Constituency,” da ong u deiwa pynrap wa kani toh du dei bor ki paidbah.
Hawa kylli, u Saleng uwa man leh u MLA warim ka Gambegre da ong u wa ym du wa da pynemkaam da i bor poisa ha kani ka Election, tangwa da pynemkaam leh da ki bor yong ka sorkar wei kattæ ki paidbah da tip wei sñiawthooh ki wa em ki ka bor wow pynbor ya u Montri Rangbah wa u Lamphang wow hiar cha madan.
Hawa kylli chooh chooh, u Saleng da ong u, “Ka NPP tieñ ko ya ki paidbah ym ya ka seiñ Congress, lada ki paidbah ka Gambegre ym jied ki ya oo wa ya Congress, ka NPP ym lai ngooh lai dem ko ha ki paidbah ha kani ka Election”.
Discussion about this post