Jowai: U Deputy Commissioner ka West Jaiñtia Hills da pyntip u wa ki muna Plastic, ki klong um Plastic, ki Thermocol wa kiwi kiwi kiwa mih na Iawmusiang, Iaw Thymme, wa kiwi ki yaw da noh ki ya kini waroh cha ki wah wa ki dooid wei manda wan u slap da poi kini ki jhep cha ki wah wa pynemkaam um dih kam ka Myntdu, Umngot, Mynkjai, Myntang wa kiwi kiwi iwa man leh pyrchah yaka hukum ka National Green Tribunal (NGT).
Kamtæ kam wow bood yaka hukum ka NGT wa phah wow pait yei rukom noh jhep ha ki yaw wei wow pynsñiawthooh paidbah ya ini wa i emkaam wow thung dieñ harood wah wei wow yabhah ya i jhep kiwa ye u pyut wa kiwa ym ye u pyut khlem da thang ya ki, u DC ka WJH da pynkrehkaam u daka Section 144 Cr.PC wei katkam ka hukum ka NGT wow khang noh yei noh jhep cha ki wah.
Kiwa leh pyrchah daw chah pynchitom ki katkam ka aiñ Solid Waste Management Rules, 2016 and Plastic Waste Management Rules, 2016 wei i daiñ kuna u man ko katkam ka Section 45(A) ka Water (Prevention & Control of Pollution) Act 1974 heiwa yei u chah kem 3 bnai waka daiñ kuna wa T. 10,000 wei lada leh biang ya ini daw chah daiñ kuna sa T. 5000 man ka sngi.
Da khang leh wow pynemkaam Plastic kiwa duna i rben wa 50 Micron wei kiwi ki Plastic kiwa duna ya ini i rben da joor i roi pynemkaam ya ki, kamjooh i noh roi ya ki ha kylleiñ ki thaw kam cha ki thaw uiñke suwari iwa da pynsahkut ya ki dooid ki liar.
Da khang leh ya kiwa dai dukan wow e ya ki muna Plastic cha kiwa wan thied mar lait noh kitu ki Plastic wa chah ka aiñ.
Discussion about this post