Jowai : Ka Khasi Student Union, Jowai Circle hei yakreh lang wa ka KSU Central Body ynnin ka 24 tarik da pynman ki ya ka Albin Lamare Excellence Award ka wa leh burom ya ki bru ka chnnong Nangbah kiwa da wanrah burom ya ka chnong nadooh kiwa leh bha ha ka exam SSLC, HSSLC, kiwa krehkaam sorkar wa kiwa mih khmat wa da pawnaam yong ka chnong.
U tynde u Albin Lamare toh uwa na ka chnong Nangbah uwa poi na i chare masi hadooh i chare ya ka ri. Da kha ya oo ha ka ha ka 8 tarik u Naitung (April) 1931 heiwa da yoh laad u pyndep hadooh ka kyrdan Lower Primary ha u snem 1945 wei hadien ini ki bei ki pa u da phah chare masi ki oo tangwa hadien chi snem da phah lai puræ biang ki oo wei da pyndep u ya ka matric ha ka kyrdan 1st Division hadooh wa pyndep u ya ka IA wei da yoh biang u ya 1st Division hadooh wa poi u cha ka puræ BA Honors wa pyndep u ha u snem 1960 wei da kreh nyngkong u ha ka ophis u DC ha Shillong.
Ha u snem 1961 da ieh u ya ini i kaam wei da kreh u ha Progress Assistant Development Block Thadlaskein wei ya ini i kaam leh da ieh u da hadien kattu katni por. Neidaw wa man u u bru wa maya ya i puræ puthi kamtæ da embynta u wow seiñ ya ka skur Proceeding High School ha Shangpung wei da neh u ha kani ka skur hadooh u snem 1965.
Hadien ini da sikai won u ha ka skur Marian Hill, Jowai hadooh u snem 1977 wei ha ini i por da yieñ yaleh MLA u na ka Nangbah Nartiang Constituency ha u snem 1972 tangwa da rem u. Ha u snem wa bood won da yaleh u kam u MDC na ka Nangbah Mynsoo Constituency wei da man u uwa jop.
Ha u snem 1978 da yakhun MLA biang u wei da jop u wei ha uni hi u jooh u snem da seiñ u ya ka Nangbah Proceeding High School kawa da kylla pyrtuid ya ka katni cha ka “Albin Lamare Memorial High School”.
Kyruiñ biang cha ka sngi pynkup burom, ha ka examin SSLC da e khusnaam cha 9 ngut, 6 ngut kiwa pass bha ya ka HSSLC katwa 5 ngut na kiwi tawan ki kyrdan puræ.
Kiwi kiwa chah pynkup burom da em ki 26 ngut kam kiwa yoh u ksoh nyngkong ya ka kyrdan IAS, IPS, MBBS, Doctorate (PhD), B.D.O, B.E, DTO, MA, MSC, BBM, MCA, BSC deilang wa kiwa yah khmat ya ki seiñ waphær waphær kamjooh ki bru samen wa da mih naam ha kiwa boon jait ki kaam wa leh ki.
U kongsan u Samuel B Jyrwa ong u wa “I kaam wa pynkmen tam wei wa ye ki khon u su kylliang ya ki bei ki kpa toh i minot wow poi cha ka thong ym du ha i puræ puthi kamjooh wa ki jar jiar ki sap wa em ha ki. Kamwa e u Blai ha i du chisien u im ha sla pyrthai i toh u pynemkaam hok ya i por yow lait ko u ktah ya ka imlang sahlang deiwa sih”.
Discussion about this post