Ka West Jaiñtia Fishing & Multipurpose Association ha ka 25 tarik uni u bnai da lai e sñiawbha ko da ka kari kit bru wa kjut namo ka Ambulance cha ka Dorbar Chnong Mynsngat, West Jaiñtia Hills District.
Neiliang ka Association da emlang u Perit Lyngdoh kam u President wa u Bunlang Phalangki kam u Secretary katwa naka chnong da em u waheh chnong, u Pham Pakma wa u Secretary chnong u P. Surong.
Neiliang u Perit hawa e yei klam da pynsñiaw u yei sñiawngooh ya ka chnong kawa da ya krehlang waka Association hawa pynman ya ka yakob khwe wei ym poi i thmu cheiwon cheiwon lada ym em ini i ya krehlang wei da yooluti u leh wa neini chakhmat leh u neh ini i ya krehlang.
Da ong u leh wa iwa pynman yakob khwe ini wa dep ha ka nan u Maiat Muksor wa em ha chnong Mynsngat ymtoh wow myntoi ya oo samen wei u su kylliang u leh cha ka chnong hanla ym yoh u e deiwa heh tangwa kajiak chisien daw ye u pynpoi cha i thrang yong oo wow e yarap neibhah kani ka seiñ toh kawa tang chi snem leh ym pu em dap ko.
Kamtæ da kyntu ya kiwa chong chnong wow sumaar wei pynemkaam hok ya kani ka Ambulance yow chakri ya ki bru manda em i kjut i chitom wei wow maya ya kani ka kari kam ka khon ka chnong.
Da kular u leh wa neiliang ka Association daw e yarap chooh chooh ko neini chakhmat.
Neiliang ka chong leh da pynsñiaw ko yei sñiawngooh yaka Association yeini i smat ko wow e yarap cha ka chnong iwa daw pynmyntoi bha ya ka chnong.
Discussion about this post