Ka Mowkaiaw Presbytery lyngba ka Social & Economic Life Development Committee dei ya krehlang wa ka yung krehkaam ka District Social Welfare Officer, West Jaiñtia Hills, Jowai ha ka 3 tarik uni u bnai da pynman ko ya ka yaphet thong wa e pyrtuid Anti-Drugs Run kam chibynta u yaleh pyrchah yei kyrni i pynemkaam Drugs wa kiwi ki jait dih pynmuaid.
Ya kani ka ya phet da pynman ha ka chnong Khmut Wasaiñ, Mowkaiaw wei da wan ya chimbynta da kiwa boon ki khon khynroo khyllood na ki chnong wa marjan. Ya kani ka yaphet da sdang deiwa kaweh ya ka lama da u TBn. M. Hadem, Moderator Mowkaiaw Presbytery.
Da sdang yei phet na ka dong Khmutwasain deiwa psiah na pyrdi chnong Mowkaiaw, Mowtyrchiah, Mukhap wei da pynkut biang ha i jooh i thaw.
Hadien wa da kut ka yaphet da pynman ya ka yalang pynche paidbah heiwa da yoh yei klam na ka J. Synnah, DSWO kawa sñeiñ ya kiwa chong chnong yei maa wa i eh wa mih nei pynemkaam Drugs.
Da yoh leh u saam ya ki song poisa wow sah kymmoo cha kiwa jop heiwa neiliang ki chynrang da yoh nyngkong u Pynidamei Biam (Laskein), wa ar u Eimishaphrang Synnah (Laskein), wa le u Pynshrainmiki Papang (Mukhap). Na ki kynthai da yoh nyngkong ka Eibyntami Iaki Tang (Lumpdang), wa ar ka Syrpailin Synnah (Laskein), wa le ka Sonality Shadap (Mowtyrshiah).
Da saam paidbah leh ya ki T-Shirt cha kiwa ya chimbynta kam wow pynpoor lang yeiwa emkaam u wan chakhmat wow kynjroi na tre ya ini i sih ha ki chnong ki thaw.
Ya kani ka yalang da pynlai da u Rev. R. Laloo, hei emlang ki Tymmen Wasan na ka Balang Khmutwasain wa na ka Presbytery, ki waheh na ka chnong wa kiwi tawan. Da pynkut leh ya kani ka yachem dei duwai na u Rev. L. O. Garod.
Hadien kani ka yalang, ki dkhot ka Committee deilang wa ki waheh wa ki khynroo khyllood na ka Balang Khmutwasain da ya chimbynta ki leh waw kymmoo warom ya ka World Environment Day deiwa thung ya ki tre dieñ ha kani ka thaw.
Kani toh katkam ka kyrwoh na u Rev. H Lyngdoh, Secretary SELD, Mowkaiaw Presbytery.
