Ka Youth Development Society Mynso-B chirup wa ka Nehru Yuva Kendra Sangathan, Jowai ynne ka sngi da pynman ko ya ka Program kawa e pyrtuid ‘Catch the rain water where it falls’ namo wow kem ya u slap heithaw wa hiar u heiwa da em i pynche pynsñiawthooh paidbah namo ka Awareness Program heiwa u RM Khlem da man u kam u bru chemphang ha kani ka sngi.
Chwa kani ka Program da em ka yalang wa tbian heiwa u CB Lamare da man u kam u Chairman, da yoh ya i klam na u Secretary Chnong ka Mynso-B u Arnest Syntem, kamjooh na u Secretary VEC u Batskem Myrchiang, da emlang leh u Chairman VDP Mynso u Rilang Lamin, kiwa sikai na ki skur waphær waphær ki khynnah skur wa ki khon khynroo wa ki manbei manpa.
Neiliang u Khlem kam u bru chemphang da pynsñiaw u ya i emkaam u pynneh wow syndong ya ka um slap khamtam deiwa chna i ya ki thaw pynlang ya ka.
Da ong u leh wa kat ka jylla Meghalaya wa joor slap tam ha pyrthai tangwa heipor tlang dang chitom u yoh um da kawa khooid lada nujor wa kiwi ki jylla ka ri.
Ha kani sngi da em leh i chaad na ki khon ka chnong Mynso-B, wei ha kani ka sngi da em ka kylli namo ka Quiz Competition heiwa kiwa jop toh u Bene Volence Dkhar wa ka Esaka War, bood sa ka Odakani Shwa Myrchiang wa u Waphrang Khlem heiwa ka Mayaphika Pan wa ka Kerry Myrchiang da yoh ki yei naam wa le.
Ya ka yalang da pynkut da ki kyntien e khublei na ka General Secretary ka Youth Development Society Mynso-B ka Balam Jingkmen Pakma.
