Ynne i janmiet, u Montri Rangbah ka jylla, u Conrad Sangma deilang wa u Symbood Montri Rangbah, u Prestone Tynsong wa ki Montri sorkar wa kynthup ya u Lahkmen Rymbui, u Renikton Lyngdoh wa u Hamletson Dohling da yachem ki wa u Montri ki Kaam Pohyung ka sorkar pyrdi, u Amit Shah ha Delhi yow pyntip cha oo yeiwa jia ha chnong Mukroh heiwa da dooh yei mynsien yong ki 6 ngut ki bru.
Neiliang ka Meghalaya da pyntip ki kammon wa da jia ini heiwa hadooh u Montri Rangbah ka Assam leh da dep u wow mynjur wa leh palatbor ki pulit ka Assam ha ini wa jia wa poi chei yasiat.
Kamtæ da kyrpaad ya ka sorkar pyrdi wow thung takit da ka CBI lane ka NIA ya ini wa jia wei wow pynchitom ya kiwa emkti ha ini i jia, heiwa neiliang u Amit Shah da kular u wow phah takit da ka CBI wei ya ka hukum daw pynmih noh ym slem de.
Da pyntip leh cha u Amit Shah wa i daw wa jia ini waroh toh wa sahkut i pynbait pood ym du ha ini thaw wa kamjooh ha kiwi ki thaw khappood hapoh ka jylla. Wei ini i jia haka 22 tarik da ktah ko yei pynbait pood wei daw hap wow kreh yow yoh biang yei chaniah kamtæ da emkaam wow tuklar da ka sorkar India heiyatoh wa ini.
Da yaklam leh yei chngaaiñ kiwa sah ha ki thaw khappood wei da kyntu leh ya ka sorkar India wow khut ya ki ar jylla yow yaklam wow pyntikna wa ini i jooh ym jia de i neini chakhmat.
