Jowai: Ka yalehke football wa tip kam ka Lion Five Knockout Football Tournament kawa mar 5 ngut chiliang wa pynlai daka Lion Mission Compound Dorbar Chnong Jowai lyngba ka Sport & Youth Affairs Committee dapoi ko chawa kut ha kani ka 9 tarik uni u bnai ha Madan Biar Lion Mission Compound.
Ha chwa u sdang yaka yalehke da em chwa ka yalang wa tbian wa pynlai da u Echwamitre Pohleng, Chairman ka Sport & Youth Affairs Committee heiwa u Wailadmiki Shylla MLA ka thaiñ da man u kam u kongsan hei emlang u waheh chnong u MC Rymbui, ki dkhot ka dorbar chong wa kiwi kiwa chah khut sñiawbha.
Neiliang u Wailadmiki hawa e yei klam da ong u ka kaam yalehke sports hi natlor wa e ko ha u bru i chait hei doh i pran man ko leh kawi na ki laad kamai wei kawa ye leh u yarap ya ki khon khynroo u lait ki nei dih i baam wa sih.
Da kyntu u ya kiwa yalehke wa kamwa yohlaad ki ya kani ka rynsan, u chimkhia bha ki yow ku chaphrang heiwa da e nongmuna u ya uwi uwa yalehke bol naka jylla u Eugeneson Lyngdoh wa ku bha chakhmat heiwa da man u leh uwa syad dor tam na kiwa yalehke hapoh ka ri. Da ong u wa u Eugeneson leh wym em phær u na i, oo leh wan u na kam kani hi ka madan chwa wow poi u haka kyrdan wa katni.
Kamtæ ymtoh u dooh mynsien tangwa toh u kreh chitom yow poi chakhmat neibhah lada em makna ka sap leh lym kreh chitom ym myntoi, wei da ong u kiwa boon hi ki wa yalehke wa pawnaam ha pyrthai leh ku ki chakhmat toh lyngba i kreh chitom.
Da khana u wa neiliang ka sorkar leh da kreh chitom bha ko yow pynku ya ka kaam Sport kaam uiñke suwari neibhah man ki kiwi na ki laad yoh khih yoh kreh.
Hawa kyruiñ won cha i yalehke hapyrdi ki artylli ki dhab wada poi Final wa kynthup ya ka Shuni Ummulong FC waka Pohhali FC napyrdi ki 31 tylli ki dhab wa wan ya chimbynta nadooh wa sdang, da sakhi wa i yakhun Final hapyrdi kini ki arliang man i iwa yathaiñ bha nadooh ka kylla step hadooh ka kylla miet.
Haka kynta yakhun yong ka kylla step, ka Shuni Ummulong da yoh ko u pynkhih nyngkong ya ka jaar lyngba u Ebor Jat Jersey No-14 ha ka minit wa 13. Kamtæ neiliang ka Pohhali leh da yakhun dohyap ko yow yoh pynuiñ ya katai ka kool tangwa kut noh ka kylla step khlem yoh pynuiñ ya ka kool.
Kamtæ hadooh ka minit wa 43 yong i yakhun ka kylla miet da yoh ka Pohhali u pynuiñ lyngba u Marbood Lato Jersey No-4 wei i yakhun da kut deiwa thap mar chi kool.
Yow yoh yei rai jop rai rem, neiliang u Referee da elaad u daka yachut Tie-breaker heiwa ka Shuni Ummulong FC dajop ko da 2-1 kool yaka Pohhali FC.
Hadien wa kut ka yalehke da saam yaka khusnaam chaka dhab wa jop deilang ka songpoisa wa T. 10,000 katwa cha ka dhab wa rem won da yoh ki T. 5,000 wei da saam leh yei naam Player of the Tournament cha u Ebor Jat.
Discussion about this post