Ka Dorbar Chnong Khimusniang, Jowai da pyntip ko wa dadep rai nadooh u snem 2019 neibynta ka MDC Election yong ka 19-Jowai South Constituency wa ka MLA Election 2023 neibynta ka 2-Jowai Constituency wa u pynman bait da ka Common Platform.
Ka dorbar chnong da rai ko leh wa hawa man ki Election Meeting neini chakhmat wow pynman bait da ka Common Platform. Wei ha kani ka kynti leh heiyatoh wa kani ka Election MDC 2025, daw pynman biang da ka Common Platform ha ka 14-02-25, heipor 7:30 i miet ha Indoor Sports Hall yong ka chnong deiwa booh leh kini ki kyndon ha wah:
Katkam i rai yong ka Dorbar Chnong Khimusniang, Jowai wa nadooh ki snem wa nachwa, ym chah ya ki kyrtong wow wanrah paidbah ki na baar chapoh ka chnong yong ngi. Wei u chah du 5 ngut ki bru kiwa na baar wa kynthup ya u kyrtong wa 2 tylli ki kari.
U chah du ya u kyrtong wow klam u pynche ya ki yurim kiwa oo yieñ u wow yaleh Election wei i por toh 30 minit samen.
Ya ka pali kiwa klam daw leh deiwa khle nasib.
Ym chah ya kiwa klam wow beiñ wow pynbaad ya kiwi wei toh u klam bait ya ka yurim wa yieñ yaleh ki.
Ym chah wow lai Rally ha kawon kawon ka rukom hapoh u pood u ang yong ka chnong.
Da kyrpaad ya ki kyrtong waroh wow sñiawbha ki wow burom wei kohngooh ya kani ka rai yong ka dorbar chnong khnang wa kani ka kaam u man ko kawa lai bait lai ryntih.
Discussion about this post