Ka NEHU-Deen Dayal Upadhyay Community College (DDUCC) for Skill Development Centre, Wahiajer ha ka 10 tarik uni u bnai da pynman ko ya ka Workshop neibynta ki warep hajrong ka phang “Organic & Integrated Farming in Modern Agriculture”, kamjooh leh ha kani ka sngi da wai paidbah ya ka “Golden Jubilee Community Hall” wa da e sñiawbha da ka Jaintia Hills Cement Manufacturer’s Association (JHCMA).
Ha kani ka sngi da ki spah ngut ki warep na kylleiñ ka Riloom Jaiñtia da wan chimbynta ki. Wei i thmu kani ka Workshop toh yow pynku yei stat i tip ki warep khnang yow ku i yoh i kot ki hei im ki.
Ha kani ka Workshop da pynyoo leh cha ki warep ya ki laad wa ye u leh deiwa pynemkaam ya ki kor ki bor wa thymme katkam ka juk katni, najrong wa sikai leh yei rukom rep tynre.
Ha ka yalang wa pynlai da ka S.M. Sungoh, Principal I/C, DDUCC, u Prof.Prabha Shankar Shukla, Vice-Chancellor, NEHU leh da chimbynta lang u dei Online, neitæ da wan emlang u R.K. Pareek, President ka JHCMA kam u kongsan deiwa emlang u Prof. H. Lamin Founder Principal I/C DDUCC, u Prof D. Walia, Prof B.P. Sahu, u Dr. F.R. Sumer, u Andrew Sari, Secretary Chnong Wahiajer, kiwa sikai na NEHU, ki warep wa kiwi.
U Vice Chancellor lyngba i klam Online da e yumut u heiyatoh i emkaam yong i rep i riang, i roi yong ka jaitbru kawa emkaam wow pynman yei rukom rep wa thymme yow pyntikna yei man tynre. Da yaroh u ya ka DDUCC wa pyrchang ko u pynman ya ki jait e sikai waphær waphær, wei da sñiawngooh haroh u ya ka JHCMA yei embynta ko u yarap ya ki chnong ki thaw ha ki bynta waphær waphær.
Ong haroh u wa i angnood yong oo toh wow pynman ya ka DDUCC kam ka thaw ya dai ya thied ya ki mar rep kiwa ye u wanrah yei yoh myntoi ym du ya ka Jaiñtia Hills tangwa ya ka jylla Meghalaya hi waroh kawi.
U R.K.Pareek hawa klam da e khublei u ya ki bor pait bor pynlai kani ka thaw e sikai wa da jop i pyrchang yong ki, deiwa yooluti wow ye chooh ki u pteiñ yei pyrchang nadooh wow pynkupbor ya ki khynroo khyllood wa ki warep lyngba ki jait e sikai waphær waphær.
U Andrew Sari hawa e yei klam da e khublei u ya kiwa pynlai ka DDUCC, ya ka JHCMA kamjooh ya ka chnong Wahiajer kawa da chah sñiawbha ya kani ka College deilang wa ka Hall neibynta i myntoi kiwa puræ ha kani ka College wa ya ki warep ka thaaiñ hi waroh kawi.
Da pynkut ya ka yalang deiwa saam ki symbe cha waroh ki warep wa wan chimbynta, katwa yei kyntien e khublei da yoh na u Wolnish Rymbai, Program Co-ordinator ka DDUCC.
Discussion about this post