U DC ka East Jaiñtia Hills District da pyntip u wa kam chibynta ka bynta wa ar ka thong kreh wa da e pyrtuid “Ka Lawei” wow e sikai lyngba ka Offline Digital Education ha ki 50 tylli ki Secondary School, da chim yukheiñ yei stat ki khynnah ha ki 7 tylli ki Secondary School kiwa lai puræ Class 8, Class 9 wa Class 10 wei ya ki 43 tylli ki skur wa dang sah daw leh ha kani ka tayaw wow wan.
Ya ki thup yukylli da pynkhreh heitæ i rukom yow tip hadooh katwon stat ki khynnah wei yow tip u pynkhreh yei sikai wa kyrpang neibynta kawi pa kawi ka skur.
Ya kani ka Test da pynkhreh ha ki Tablet yow sñiawthooh ki khynnah leh chaphang ki Digital Test neibhah kiwa boon ki Competitive Exam katni toh kiwa da sdang leh da ki Digital Test.
Ha kawi won ka khubor, u DC da pyntip u leh wa ya ka Community Study Hall wa da chna ha Mukhailong da pynemkaam bha da ka chnong neibynta ki khynnah kiwa wan na ki manyung wa dooh wa duk yow pynkreh ya ka Class 10 Exam ki.
U Waheh Chnong da pyntip u wa deiwa sdang ki skur katni, daw pynemkaam ya kani ka thaw neibynta waroh ki Class.
I thong wow booh ya kani ka Community Study Hall toh yow pynbiang ya ka thaw kreh kot kawa da biang ki thaw chong, ki soodong wa miat dur kamjooh kawa biang bordiñ neibynta kitu ki khynnah wym yoh thaw deiwa miat yow chong khrehkot ha yung ki.
Kani ka Community Study Hall toh kawa em wa ki Tube Light kiwa pyndait lang wa u Inverter yow lait u thut i puræ puthi.
U DC da pyntip u wa deiwa jop i krehkaam kani ka Community Study Hall, daw sdang leh ya kam ini i jooh ha kiwi ki chnong.
Ha iwi won i liang, u DC da pyntip u wa da saam sa ar tylli ki 65″ Interactive Smart Panels kawi ha Jaintia Eastern College wa kawi won ha Star Cement School yow yarap neibynta ki khynnah wow maad ki ya ka Digital Education.
