Da ka dorbar paidbah u pynman neibynta ka mynried ka Wah Myntdu

Ka seiñ Khooid Ya Ka Wah Myntdu da pyntip ko cha phi waroh kiwa chong chnong tawiar yong ka Wah Myntdu, khamtam ya phi kiwa im wa sah ha Jowai, ki warep ha Myntdu Pynthorneiñ wa Pynthorwah wa ki chnong kiwa harood yong ka Myntdu wa neiliang ka seiñ kwah ko u pyntip sachisien wa ka toh kawa thrang wow kyrsu, yow pynneh, pynbha, pynmiat chooh chooh ya ka tawiar ka Wah Myntdu, kawa hadooh katni dang yoh i naka yaka um, ka la’ær, i khyndaw i thaw wa i bordiñ wa pynim ya i manbru longbru yong i hadooh ynne.

“Kamtæ nadooh ki sngi ki bnai wa da lai hadooh ynne ka sngi, i kiwa kitkaam chirup wa ki dkhot ka EC ka seiñ, da yaleh i kat iwa ye i bor i buit i yong i wow ya pynsñiawthooh, u yaklam, u yakreh da ki kaam heiyatoh wow yoh ya iwa thrang i yong phi yong i kiwa chong chnong, yow imlang yow chngaaiñ lang ka manbru ka longbru ka yong i chirup waka Wah Myntdu. Kitai ki kaam wa da yakreh i da khana da wyrta i ki lyngba ki laad pathai khubor”.

“Kamtæ katkam wa man hadooh ynne ka sngi ha tawiar yong ka Wah Myntdu, jan da yoo da chynna hi phi, wa da sñiawthooh hi phi wa da ktah bha ko da man ka yap ka im ya i lang waroh. Kat da kamtæ yoo i wa da dawa bha ko ya uwi pa kawi kiwa chong chnong wow chim phi i kitkhlieh, u sñiawbha phi u pynlait chynnam yei por i yong phi yow wan ya chimbynta waroh ha ka dorbar paidbah kawa daw man haka 03-02-24 heipor 12:30 pyrdi sngi ha yungwalieh ka Chilliangraij Dorbar Chnong, Jowai”.

Ha kani ka dorbar daw yaklam bniah bha ya i pynkrehkaam ka sorkar yaka hukum ka NGT haka mutkotduma wa da yaleh da u Sajay Laloo pyrchah yaka sorkar Meghalaya wa kiwi yow yada yaka Myntdu, ka um, i chyiap ,u chna pynbha wa kiwi kiwi.

Related posts

I pynbna wa emkaam neibynta kiwa kwah u chimbynta ha ka 1st Miss Latuber Beauty Contest 2024

November 21, 2024

Chem uwa lai puræ PhD uwa na Nongjngi ya ka dakha wa thymme ha Lakroh

November 20, 2024

Deiwa wan ya chimbynta lang phi chirup yow rai lang i wa kammon u ya im i mynstep, ka mynried chirup waka wah Myntdu. Ka Khooid Ya Ka Wah Myntdu u krehkaam chooh ko namo u pyndam noh i ka.

Kyrpaad i ya phi wow u sñiawbha u yarap u khut u yah lang wa kiwi kiwa em i kitkhlieh yaka yap ka im yong i ki para wa im wa chong chnong tawiar ka Myntdu cha kani ka dorbar.

I pyntip na u K.L. Pariat, President ka Khooid Ya Ka Wah Myntdu.