Yow pynku yei rukom thoh, rukom klam wei kynnoh Khasi ha ki khynroo khyllood wa lai puræ, ka Khasi Department yong ka Thomas Jones Synod College Jowai, ynnin ka sngi da chim ko yaka luti u pynman yei e sikai wa kyrpang ya kiwa sikai Khasi yong ki skur ki College waphær ka District hajrong ka phang “Ka rukom hikai iaka ktien Khasi haki jaka pule”.
I daw wa pynman ya kani ka e sikai toh neidaw wa kiwa sikai chem ki yei duna kiwa puræ Khasi manda poi ha ki College wei heijooh i por chem chitom leh u pynbait. Kamtæ pyrkhat ki wa deiwa yoh u e yumut ya kiwa sikai ya ki khynnah skur nadooh ki skur daw rap pynsuk ya ki mynda lai College ki.
Ha kani ka sngi da wan wow e sikai bniah da ki bru chemphang wa kynthup ka Prof. (Dr.) Antoinette Kharmalki na ka North Eastern Hill University Shillong kawa da klam hajrong ar tylli ki phang wa kynthup “Ka kara ktien ha ka ban hikai iaka ktien Khasi” wa “Ka jingthew iaka jinglah ki nongpule”.
Katwa ka Balarishisha Nongkynrih, Asst. Professor Shillong College da klam ko hajrong “Ki buit hikai” wei hajrong “Ka jingpynshongdor iaka ktien”.
Ka Balarishisha Nongkynrih hawa klam hajrong ka phang “Ki buit hikai” da klam ko ya ki le bynta, kitæ ka buit hikai ha ki kamra e sikai, ka buit wa yatoh wa i thoh i tar (Literature) wei kammon ka buit sikai yei ktien.
Ong haroh ko wa kam kiwa sikai emkaam bha ya ki u tip ki ya kiwi won ki jait ktien wei rukom pynemkaam ya ka Grammar hei ktien para, deiwa e nongmuna wa lada hei pynkylla ktien ym ye u leh bait thij yei yumut næ ka Test wa leh haka Khasi, emkaam u pait yaka dulir tynre leh khnang wow bichaar yaka kot kam ka kylla ktien næ Translation.
Ka Prof. (Dr.) Antoinette Kharmalki hawa klam hajrong ka phang, “Ka jingthew iaka jinglah ki nongpule” ong ko kam kiwa sikai toh u chynna u tip ki yei man i long kiwa puræ, neibhah wym ye u ong wa waroh kiwa puræ toh kiwa biej.
Da ong ko leh wa ha kini ki sngi kiwa sikai ym em bor de ki kam nachwa wa kat iwa ong ki leh man bait iwa toh, tangwa haka Humanistic Approach pait ko yei ye uwa puræ neibhah wym em de man ki du kam kiwa bood donhi.
Tangwa ha kini ki sngi kiwa sikai man ki kam kiwa e laad ya kiwa puræ u yachem yumut ki wei thooh ki yei yukylli yei yi wa angnood ki yow sñiawthooh ki yeiwon iwon wa artatien ki.
