Ka Environment Co-ordination Committee (ECC) Elaka Sutnga ynne ka sngi da lai yachem ko ya u DC ka East Jaiñtia Hills District kam chibynta wow booddien yei wym kohngooh ki karkhana pynmih Coke ya ka hukum wow phah khang ya kitu kiwa krehkaam pyrchah ya ka aiñ.
Ha ini i yachem ka ECC da emlang leh ki Waheh Chnong ka Elaka Sutnga heiwa da yachem leh ya u SP wa u EAC ka East Jaiñtia Hills ha yung krehkaam u DC uwa da kular wa nadooh myntu ka sngi daw e da ka FIR pyrchah ya ki tre karkhana Coke kiwa em hapoh ka Elaka Sutnga kiwa pynkrehkaam pyrchah ya ka aiñ kamjooh pyrchah ya ki hukum yong oo.
Ka ECC da booh, da e por ko leh hadooh ka 20-08-2021 wow pyndep ya i kular yong u DC wei lada ka ECC ka chem ko wa ka yung krehkaam yong u DC ym krehkaam ko, ka ECC ym banse ko wow chim won da kiwi ki luti kiwa rap eh wot wow pynman da ka General Meeting hapoh ka Elaka Sutnga kam ka dak pyrchah wei lada mih iwon iwon i kulmar, ka yung krehkaam u DC daw hap ko wow chim ya i kitkhlieh hajrong ini.
